БНХАУ-ын Засгийн газрын өнгөрсөн зун батлан хэрэгжүүлж эхэлсэн үндэсний аюулгүй байдлыг хамгаалах хуулийн хүрээнд Хонконгийн нутаг дэвсгэрт өргөн хамарсан баривчлан саатуулах ажиллагааг явуулжээ. Эх сурвалжуудын мэдэгдэж байгаагаар үндэсний аюулгүй байдлын хууль зөрчсөн гэх үндэслэлээр ардчиллын дэмжигч 50 орчим хууль тогтооч, тэмцэгчийг баривчлан саатуулсан байна.

Хонконгийн Ардчилсан намын Facebook хуудсанд нийтэлснээр өнгөрсөн жил ардчиллыг дэмжигч нэр дэвшигчдийг сонгох анхан шатны санал хураалттай холбогдуулан баривчилгаа явуулсан гэж мэдээлжээ. Баривчлагдсан тэмцэгчдийн дунд Ардчилсан нам, Иргэний намуудын олонд танигдсан гишүүд болох Жеймс Тү, Лэм Чеук Тинг болон Лэстер Шум нар багтсан гэж эх сурвалжууд дамжуулж байна.

Хонконгийн сөрөг хүчний намуудын эвлэл өнгөрсөн долдугаар сард хууль тогтоогчдын зөвлөлийн сонгуульд өрсөлдөх хамгийн өндөр магадлалтай нэр дэвшигчдийг тодруулахаар анхан шатны санал хураалтыг зохион байгуулсан юм. Уг санал хураалтыг хууль зөрчсөн гэж үзлээ.

Хэдийгээр есдүгээр сард Хонконгийн Парламентын сонгууль болох ёстой байсан ч цар тахлын улмаас хойшлуулсан. Хэрэв сөрөг хүчний бүлгүүд олонхийн суудал эзэлж чадвал Бээжингээс ирүүлсэн санал, ардчилал шинэчлэлтэд үзүүлж буй дарамт шахалтад хориг тавихад хангалттай эрх мэдэлтэй болно гэж үзэж байгаа юм.

Эх сурвалж: ВВС

---