Францын баруун хэсэгт дор хаяж 2,500 хүн оролцсон хууль бус шинэ жилийн үдэшлэгийг зохион байгуулсан этгээдийг коронавирусийн хорио цээрийн үед хүний ​​амь насанд аюул учруулсан хэргээр баривчилжээ. Тус үдэшлэг нь Франц даяар шөнийн цагийн хорио цээрийн дэглэм тогтоосон үед болсон юм.

Сэжигтэн болох 22 настай эрэгтэй нь мөн эд хөрөнгийн хохирол учруулсан болон хар тамхины хэргээр цагдан хоригдоод байгаа гэж Прокурор Филипп Аструк хэвлэлийн бага хурлын үеэр хэлсэн байна. Түүнчлэн тэрээр үдэшлэг зохион байгуулахад оролцсон гэдгээ хүлээн зөвшөөрсөн гэдгийг тэмдэглэжээ.

Өнгөрсөн долоо хоногийн пүрэв гарагт хоёр мянга гаруй франц болон гадаадын иргэд тус улсын Бриттани бүсийн Лиуронд цугларч, шинэ жилийн томоохон үдэшлэг хийсэн юм. Тэд бямба гарагийн өглөө буюу ойролцоогоор 36 цагийн дараа тарж эхэлсэн байна. Албаныхны мэдээлснээр үдэшлэгт оролцсон иргэд цагдаа нар руу дайрч, цагдаагийн машиныг шатаан, гурван алба хаагчийг шил, чулуугаар цохин, гэмтээсэн аж.

Ингээд хууль хяналтынхан бямба гарагт сэжигтний гэрээс бэлэн мөнгө, хууль бус мансууруулах бодис болон дуу хөгжмийн хэрэгсэл олон, түүнийг баривчилжээ. Мөрдөн байцаагчид одоо өөр бусад зохион байгуулагчдыг олж тогтоохоор ажиллаж байгаа гэнэ.

Цагдаа нар уг хэрэгтэй холбогдуулан 1,600 гаруй хүнд торгууль ногдуулсан бөгөөд тэдний 1,200 нь цар тахлын үеийн дүрэм зөрчсөн, 200 гаруй нь хар тамхи, мансууруулах бодистой холбоотой гэмт хэрэгт холбогдсон байна. Үдэшлэгийн үеэр оролцогчдын тав хүрэхгүй хувь нь амны хаалт зүүсэн байжээ.

Эх сурвалж: Associated Press

---