Тайвань руу хурдны завиар зугтахыг завдсан арван Хонконгийн иргэнийг БНХАУ-д гурван жил хүртэлх хугацаагаар хорихоор болжээ. Тэднийг хилээр хууль бусаар нэвтрэх ажиллагаа зохион байгуулж, оролцсон гэх хэрэгт буруутгасан байна.

Тус иргэд бүгд идэвхтэн байсан бөгөөд тэдний ихэнх нь Хонконгт өнгөрсөн жил болсон Засгийн газрын эсрэг жагсаалтай холбоотой хэрэгт буруутгагдаж, эсвэл батлан ​​даалтад гараад байсан аж. Тэднийг 700 км-ийн зайд орших Тайванийн өөртөө засах арал руу зугтахаар оролдож байх үед Хятадын эргийн хамгаалагч нар баривчилжээ.

Хууль бусаар хил нэвтрэх оролдлогыг зохион байгуулсан гэж буруутгагдсан хоёр идэвхтэнд хоёр, гурван жилийн хорих ял тус тус оноосон бол үлдсэн найман хүн нь хууль бусаар хил нэвтрэхэд оролцсон хэргээр шийтгэгдэж, бүгд долоон сарын ял авсан байна. 

Хятадын албаныхан түүнчлэн тухайн завин дээр байсан 18-аас доош насны хоёр иргэнийг Хонконгийн цагдаад хүлээлгэн өгсөн гэнэ. Өмнөд Шэньжэнь хотын эрх баригчдын хэлснээр тэд хууль бусаар хил давсан гэдгээ хүлээн зөвшөөрсөн боловч тэдэнд ямар нэгэн хариуцлага хүлээлгээгүй аж.

Тэгвэл АНУ-ын Төрийн Департаментын төлөөлөгч БНХАУ-ыг эдгээр 12 хүнийг суллаж, улсаасаа явахыг зөвшөөрөхийг шаардан, "Тэдний "гэмт хэрэг" нь дарангуйллаас зугтах явдал байсан" хэмээн тэмдэглэжээ.

Эх сурвалж: CNN

---