Өмнөд Солонгос улс дөрвөөс дээш хүнтэй цугларалт зохион байгуулахыг хориглосон хоригийг бүх улс орон даяараа өргөжүүлж, нийслэл Сөүлд урьд өмнөхөөсөө хамгийн чанга хатуу хорио цээрийн дэглэмийг хэрэгжүүлжээ.

Тус улсад сүүлийн үед дэгдээд буй халдварын давлагааны үеэр цар тахлын тархалт тогтмол өсөж, нас баралт эрс нэмэгдээд байгаа юм. Өнгөрөгч ням гарагийн байдлаар коронавирусийн 1,020 шинэ тохиолдол бүртгэгдэж, нийт халдварын тохиолдол 64,264 болон, 981 хүн нас бараад байгаа болохыг Өмнөд Солонгосын Халдварт өвчнийг хянах, урьдчилан сэргийлэх агентлаг мэдээлэв.

Сөүл хот болон хөрш зэргэлдээ бүсүүдэд хэрэгжүүлэх хорио цээрийн өргөтгөсөн дэглэмийн хүрээнд сүм, ресторан, кафе, цанын бааз болон бусад ижил төрлийн үйлчилгээний газруудыг хааж байгаа аж.

Үүнтэй холбоотойгоор Ерөнхий сайд Чун Се Кюн тус улсын вакцинжуулалтын хөтөлбөрт бэлтгэхийн тулд бүх хүчээ дайчлан ажиллахыг уриалсан байна. Тэрээр "Халдварт өвчнийг хянах, урьдчилан сэргийлэх агентлаг нь вакцин ирсэн мөчөөс хойших бүх үйл явц буюу вакциныг тараах, хадгалах, тарих, аливаа дэглэмийг дагаж мөрдөхөд бүрэн төгс бэлдэх хэрэгтэй" гэж Засгийн газрын хуралдаан дээр хэлжээ.

Эх сурвалж: Reuters

---