Улаанбаатар хотод тогтоосон Гамшгаас хамгаалах бүх нийтийн бэлэн байдалд шилжсэн хугацаа 2021 оны нэгдүгээр сарын 6-нд дуусна.
Өчигдөр ЭМЯ, МХЕГ, ОБЕГ зэрэг мэргэжлийн 11 байгууллага өнөөгийн нөхцөл байдлыг дүгнэсэн эрсдэлийн үнэлгээг хийсэн байна. 

Бүх нийтийн бэлэн байдлын зэрэгт шилжүүлсэн хугацааг сунгах эсэхийг Улсын онцгой комиссын ажлын хэсэг болон мэргэжлийн байгууллагуудын санал, дүгнэлтийг нэгтгэж, өнөөдөр Засгийн газрын хуралдаанаар эцэслэн шийдэх юм. 

Эрүүл мэндийн сайд Т.Мөнхсайханы зүгээс “Цаг үеийн нөхцөл байдал өдөр өдрөөр өөрчлөгдөж байна. Сүүлийн хоёр хоногийн дотор хүн амын дундаас эх үүсвэр нь тодорхойгүй 18 тохиолдол гарч ирлээ. Цаашдаа хэрхэн үргэлжлэхийг мэдэхгүй байна. Тиймээс хөл хориог сунгах санал гаргах магадлал өндөр байгаа” гэсэн юм. 

Өнөөдөр УОК, Засгийн газар хуралдаж, нийслэлд тогтоосон хатуу хөл хорионы дэглэмийг сунгах эсэх асуудлыг хэлэлцэж, эцсийн шийдвэрийг гаргана.  

---