Дэлхий дээр амьдарч буй хамгийн урт настай хүн болох Японы иргэн Канэ Танака өнгөрөгч бямба гарагт 118 насныхаа төрсөн өдрийг тэмдэглэжээ.

1903 оны нэгдүгээр сарын 2-нд төрсөн Танака 2019 оны гуравдугаар сард дэлхийн хамгийн өндөр настай хүнээр тодрон, Гиннесийн номд бичигдсэн юм. Тэрээр мөн өнгөрсөн оны есдүгээр сард Японы бүх цаг үеийн хамгийн өндөр насалсан иргэнээр нэрлэгдсэн билээ. Түүний энэхүү амжилт нь 117 нас 261 хоногоор тогтоогдсон.

Одоо Фукуока дахь асрамжийн газарт амьдардаг Танака бусад оршин суугчдын хамт төрсөн өдрөө тэмдэглэжээ. Тэрээр ихэнх цагаа дасгал хөдөлгөөн хийн, тоо бодож, реверси тоглоом тоглон өнгөрүүлдэг байна. Танака мөн хоолны дуршил ихтэй бөгөөд тэрээр шоколад идэж, Кока-Кола уух дуртай гэж асрамжийн газраас мэдээлжээ.

Өөрийнх нь урт насалсан нууцын талаар асуухад Танака "Амттай хоол идэж, сурч боловсрох" гэж хариулжээ. Түүнчлэн тэрээр 120 нас хүртлээ амьдрахаар зорьж байгаагаа тэмдэглэсэн байна.

Түүний 61 настай ач хүү Эйжи "Коронавирусийн цар тахлын улмаас хүнд хэцүү нөхцөл байдал үүсээд байгаа хэдий ч Канэ сайн байгаа. Тэр өдөр бүр хөгжилтэй байдагт би баяртай байдаг" хэмээн ярьжээ.

Эх сурвалж: Japan Today

---