Оксфордын их сургуулийн эрдэмтэд болон АстраЗенека эмийн фирмийн хамтран үйлдвэрлэсэн коронавирусийн эсрэг вакцинд Их Британийн эрх баригчид зөвшөөрөл олголоо. Ингэснээр ирэх долоо хоногоос эхлэн уг вакцинаар коронавирусийн эсрэг дархлаажуулах хөтөлбөрийг үргэлжлүүлэхээр болж байна.

Их Британийн засгийн газар 70 орчим хувийн үр дүнтэй Оксфорд-АстраЗенекагийн вакцинаас 100 сая тунг захиалсан нь 50 сая хүнд тарина гэсэн үг юм. Вакцинжуулалтыг аль болох богино хугацаанд өргөн хүрээнд хамруулах нь ард иргэдийн амьдралыг эргэн хэвийн байдалд түргэн шилжүүлэх зорилготой.

Үүнээс өмнө Их Британи Пфайзер/БиоНТекийн вакциныг дэмжсэнээр тус улсад хүлээн зөвшөөрөгдсөн анхны коронавирусийн эсрэг вакцин болсон юм. Маргарет Кийнэн дэлхий дээр хамгийн анхны вакцин тариулсан хүн болсноос хойш Их Британид 600,000 гаруй хүн хамрагдаад байна.

Өнгөрсөн хугацаанд эхлүүлсэн вакцинжуулалт удаашралтай гэж үзсэн бол АстраЗенека-Оксфордын вакцин хямд төсөр бөгөөд их хэмжээтэй үйлдвэрлэхэд хялбар тул дархлаажуулалт өргөжнө гэж найдаж байгаа юм.

Пфайзер/БиоНТекийн вакциныг цельсийн -70 хэмийн хүйтэн хөргүүрт хадгалах шаардлагатай бол Оксфордын вакциныг энгийн хөргүүрт хадгалах боломжтой ажээ.

Эх сурвалж: ВВС

---