Их Британи, Канад, Америк зэрэг дэлхийн чинээлэг улс орнуудад коронавирусийн эсрэг бүх нийтийн вакцинжуулах хөтөлбөрийг албан ёсоор эхлүүлээд байгаа бол пүрэв гарагт Латин Америкийн орнууд эхлүүллээ.

Мексик, Чили, Коста Рика улсууд Америк-Германы хамтарсан Пфайзер/БиоНТекийн вакцинаар дархлаажуулалтын хөтөлбөрийг эхлүүлсэн байна. Мексик улс тус вакцинаас 3,000 тунг эхний ээлжинд авчирж, эмнэлгийн сувилагч хамгийн эхний тунг тариулжээ. Үүнээс хэдхэн цагийн дараа Чили, Коста Рика улсууд мөн Пфайзер/БиоНТекийн вакциныг зайлшгүй шаардлагатай иргэддээ тарьж эхэлсэн байна.

Мексик улс дархлаажуулах хөтөлбөрт зориулан 34 сая тун Пфайзер/БиоНТекийн вакциныг Бельги улсаас худалдаж авахаар захиалжээ. Эрүүл мэндийн салбарын ажилтнуудыг 2021 оны эхний улиралд багтааж вакцинд хамруулна гэж төлөвлөж байна. Тус улсад 1,3 сая хүн Ковид-19-ийн халдвар авч, 120,000 гаруй хүн нас барсан юм.

Латин Америкийн улс орнууд дундаас тархалт өндөр байгаа Аргентин ОХУ-ын Спутник V вакциныг нэн шаардлагатай үед хэрэглэхээр захиалаад байсан. Буэнос-Айрес хотод пүрэв гарагт 300,000 тун вакцин ирсэн тул удахгүй бүх нийтийг дархлаажуулах хөтөлбөрийг эхлүүлнэ гэж таамаглаж байна.

Эх сурвалж: ВВС

---