Нийслэлийн засаг даргын 2018 оны захирамжийн дагуу “Хан уул дүүргийн Соёлын ордны бага танхимыг номын уншлагын жишиг танхим болгон тохижуулах 90 сая төгрөгийн тендерийг” НСУГ-аас зохион байгуулж Харцагат Уул ХХК хийж гүйцэтгэсэн байна.

2019 оны 2 дугаар сарын 22-ны өдөр нийт 54 нэр төрлийн 90,158,0 мянган төгрөгийн гэх чанарын шаардлага хангахгүй тавилга хэрэгсэл, тоног төхөөрөмжийг Харцагат Уул компани хүлээлгэн өгөхийг оролджээ. Тухайн үед Хан-Уул дүүргийн Соёлын ордны даргын үүрэг гүйцэтгэж байсан О.Анхбаяр НСУГ-аас хяналт шалгалт хийгээгүй тул хүлээж авах акт дээр гарын үсэг зурахаас татгалзсан байна. Гэтэл тус тендерийн ажилд хяналт тавих үүрэгтэй НСУГ-ын мэргэжилтэн М.Мөнхсайхан, Ш.Гомбосүрэн нар Харцагат Уул компанийн захиралтай нийлэн 10 гаруй өдөр гарын үсэг зуруулахаар Анхбаяр даргын үүдийг сахиж суужээ.

Тус ажлыг чанарын шаардлага хангахгүй, хяналт шалгалтаар ороогүй тул хүлээж авахаас татгалзсан ч НСУГ-ын дарга Ж.Дамдинцэрэн тус ажлыг хүлээж авах акт дээр хурдан гарын үсэг зурахыг шаардаж, үлдсэн тоног төхөөрөмжийг нийлүүлэх 11 сая төгрөгийн ажлыг би зохицуулан гэснээр хүлээж авах акт дээр гарын үсэг зурагдсан байна. Гэвч Хан-Уул дүүргийн 90 сая төгрөгийн тохижилттой номын сан одоо болтол үүдээ нээхгүй 2 жилийн нүүрийг үзээд байгаа юм.

НСУГ-ын дарга Ж.Дамдинцэрэн 2017 онд эхнэртээ автомашин худалдан авч өгсөн боловч уг машиныг худалдан авсан хөрөнгөө ХОМ-тээ тусгаагүй зөрчлийг АТГ-аас илрүүлж, ажлаас халах арга хэмжээ ав гэсэн бичиг ирүүлж байсан. Мөн Ж.Дамдинцэрэн нь өөрийнхөө удирдлага дор ажилладаг НСУГ-ын мэргэжилтэн Б.Балжиннямыг ажлын байран дээрээ зодож танхайрсан. “Гэрэлт гудамж” төслийн өдөр тутмын үйл ажиллагааг хариуцан ажиллах менежментийн компанийг ямар ч сонгон шалгаруулалтгүйгээр өөрийнхөө хамаарал бүхий компанид өгч байсан юм. Ингэснээр түүнийг хотын дарга асан С.Амарсайхан төрийн албаны нэр хүндийг эрхэмлэх үүргээ биелүүлээгүй гэсэн үндэслэлээр хоёр жилийн өмнө ажлаас нь халж байсан билээ. Тэрээр хоёр жилийн турш хууль шүүхийн байгууллагаар явсны үндсэн дээр албан тушаалдаа эргэж томилогдоод байгаа юм.

Гэвч Ж.Дамдинцэрэн нарын Хан-Уул дүүргийн Соёлын ордны номын сангийн тус тендерийг зохион байгуулан ажиллаж, бүрэн гүйцэтгэгдсэн хэмээн хүлээж авсан уг хэрэг нь улсад 11 сая төгрөгийн хохирол учруулж, 80 гаруй сая төгрөгийн чанаргүй тоног төхөөрөмж, тавилга нийлүүлснээр тус номын сан хоёр жилийн турш үүд хаалгаа нээж чадахгүй байсаар байна.

---