The Guardian сэтгүүлийн нийтэлсэн баримтад АНУ-ын сансар судлалын станц НАСА-ын судалгааны төвд байсан сармагчингуудыг нэг хоногийн дотор бүгдийг нь устгасан тухай бичжээ. Энэ мэдээлэл амьтны эрхийг хамгаалагчдын шүүмжлэлтэй тулгарч байна.

Силикон Валлид байдаг НАСА-ын Амес судалгааны төвд нийт 27 сармагчин байжээ. Гэвч өнгөрсөн жилийн хоёрдугаар сарын 2-ны өдөр тэдгээр сармагчингуудад үхлийн тариаг нэг дор хийсэн байна. Ингэхдээ 27 сармагчны ихэнх нь хөгширсөн ба 21 нь Паркинсоны өвчтэй болсон байсан гэжээ.

Тэднийг амьтан үржүүлгийн төвд аваачилгүй оронд нь амь насыг нь тариа хийж хороосон явдал нь ёс зүйн доголдолтой үйлдэл гэж амьтны эрхийг хамгаалагчид шүүмжилсэн байна. Харин Нью Мексикогийн их сургуулийн амьтны зан байдал судлалын мэргэжилтэн Жон Глак тэдгээр сармагчингууд лабораторийн амьдралд угийн их бухимдалтай байсан ба амьтан үржүүлгийн газар очоод ч удаан тэсэхгүй байсан гэж тайлбарлажээ.

Цагаан ордны төлөөлөгчдийн танхимын гишүүн Кэтлин Райс НАСА-ын захиргаа руу захидал бичиж уг баримтын талаар тайлбар өгөхийг шаардсан байна. Мөн тэрээр Засгийн газарт хандан судалгааны төвд судалгаанд ашигласан амьтдыг хүнтэй ижил тэтгэвэрт гаргадаг байх талаар авч үзэхийг уриалжээ.

АНУ-ын сансар судлалын станц амьтдыг судалгаанд ашиглаад удаан хугацаа өнгөрсөн. Хэм нэртэй шимпанзиг өдөр бүр сургуулилалт хийн бэлтгэсээр 1961 онд сансарт нисгэсэн хамгийн анхны шимпанзи болгосон юм. Гэвч өнгөрсөн жил нэг дор устгасан 27 сармагчинг ямар нэг судалгаа эсвэл даалгаварт ашигласан тухай мэдээлэл байхгүй ажээ.

НАСА-аас бусад лабораториудад сармагчинг туршилтад өргөн ашиглаж ирсэн. 2017 оноос хойш дэлхий даяар нийт 74,000 сармагчин лабораторийн туршилтад оржээ. Тэдгээр амьтад дээр туршилт хийж дууссаны дараа хэрхэн ханддаг нь тодорхойгүй байна.

Эх сурвалж: The Guardian

---