Өмнөд Солонгост бүх нийтийн сонгууль болсон өнгөрөгч дөрөвдүгээр сарын 15-ны шөнө Сөүл хотын ойролцоох орон нутгийн сонгуулийн зохион байгуулалтын барилгаас саналын хуудас хулгайлсан 60 гаруй насны эрэгтэйд 2.5 жилийн хорих ял оноожээ.

Үжинбүгийн дүүргийн шүүх 65 настай Ли гэгч этгээдэд 2.5 жилийн хорих ял оноож, тус улсад өмнө нь гарч байгаагүй энэхүү гэмт хэрэг нь улс төрийн хуйвалдаан үүсгэж болзошгүй тул хатуу шийтгэл хүлээлгэх ёстой гэж мэдэгдсэн байна. Тус улс одоогийнхоо сонгуулийн системийг нэвтрүүлснээс хойш саналын хуудас хулгайлсан хэргээр шүүхээс шийдвэр гаргаж байгаа нь энэ анхны тохиолдол юм.

Ли дөрөвдүгээр сарын 15-наас 16-нд шилжих шөнө Гүри хотын биеийн тамирын заалнаас зургаан саналын хуудас хулгайлж, сөрөг хүчний хууль тогтоогч асан Мин Кёнг Вукт хүргүүлсэн гэж буруутгагдсан билээ. Харин Мин тэдгээр саналын хуудсыг сонгуулийн луйврын нотолгоо гэж мэдэгдсэн.

Тэгвэл шүүхээс "Шүүгдэгч улс төрийн үзэл бодолтой байх эрх чөлөөтэй боловч улс төрийн зорилгоор хуурамч баримт үйлдэх эрхгүй. Шүүгдэгчийн хулгайлсан зүйл бол зургаан саналын хуудас биш, харин сонгуулийн шударга байдал, нийтийн эрх мэдэлд итгэх итгэл, либерал ардчилал юм" хэмээн тэмдэглэжээ.

Эх сурвалж: Yonhap News Agency

---