УИХ-ын чуулганы баасан гарагийн хуралдаан эхэллээ. Чуулганы хуралдаанд таван танхим болон цахимаар гурван гишүүн нийт 43 гишүүн оролцож байна.

Өнөөдрийн хуралдаанаар дараах асуудлуудыг хэлэлцэнэ. Үүнд: 

• Олон Улсын Эрүүгийн шүүхийн дархан эрх болон эрх ямбын тухай хэлэлцээрийг соёрхон батлах тухай хуулийн төсөл /Засгийн газар өргөн мэдүүлсэн, соёрхон батлах/;
• Хүмүүнлэг боловсролыг дэмжих тухай хуулийн төсөл /Улсын Их Хурлын гишүүн Б.Бат-Эрдэнэ нарын 4 гишүүн өргөн мэдүүлсэн, хэлэлцэх эсэх/;
• Зэвсэгт хүчний тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төслүүд /Засгийн газар өргөн мэдүүлсэн, хэлэлцэх эсэх, хаалттай/.
• УИХ-ын гишүүн С.Бямбацогт өнөөдрийн хуралдаанаар гурван асуудал хэлэлцэж буй тул Гадаадын иргэний эрх зүйн байдлын тухай хуулийг нэмж оруулах горимын саналыг оруулсан бөгөөд гишүүдийн дийлэнх дэмжсэн тул хоёрдугаар асуудлаар хэлэлцэхээр боллоо. 

УИХ-ын гишүүн Б.Бат-Эрдэнэ нарын 4 гишүүн өргөн мэдүүлсэн Хүмүүнлэг боловсролыг дэмжих тухай хуулийн төслийг хэлэлцэх эсэхийг хэлэлцэж эхэллээ.

2020 оны тавдугаар сарын 7-ны өдөр уг хуулийн төслийг өргөн барьсан бөгөөд хүүхдийг эх орон, ээж аав, элгэн саднаа хайрлах, дээдлэх учир утгыг ёсчлон сахиулж сургах, хүний жудагтай, хайр энэрэлтэй, найз нөхрөө эрхэмлэдэг, тэсвэр тэвчээртэй, аливаа атаа жөтөө, хийрхлээс ангид, ямагт өөрийнхөө үнэ цэнийг мэдэрч, алдахгүй байхыг хичээдэг зан төлөвт сургах, хувь хүний унаган төрөлх шинж, зан төлөвийг бага наснаас нь тандан илрүүлж, хойшид баттай суулгах нөхцөлийг бий болгоход энэхүү хуулийн төсөл чиглэнэ гэдгийг төсөл санаачлагчид хэлж байв. 

---