Твиттер ашиглан хохирогчдоо онилж, амь насыг нь бүрэлгэсэн иргэнд Японы шүүхээс цаазын ял оноолоо. Цахим сүлжээ ашиглаж есөн хүний амь насыг хороож, цуврал аллага үйлдсэн хэрэг олон нийтийг ихээхэн цочирдуулаад байсан юм.

“Твиттер алуурчин” гэж хочлогдсон Такахиро Ширайшиг 2017 онд баривчлан саатуулжээ. Түүний амьдардаг орон сууцаас хохирогчийн цогцосны хэсгийг олсны дараа цагдаа нар хэргийг илрүүлсэн байна.

Энэ жилийн аравдугаар сард түүнийг гэм буруутай гэж үзсэн ба гэмт этгээд түүний эсрэг тулгаж байгаа хэргийг хүлээн зөвшөөрсөн юм. Түүний гарт амиа алдсан хохирогчдын ихэнх нь  амиа егүүтгэхийг хүссэн залуу охид эмэгтэйчүүд байжээ.

30 настай эрэгтэй сэтгэлээр унасан эмэгтэйчүүдийг цахим сүлжээнээс олж, тэднийг урхидан гэртээ авчирч, үхэхэд нь тусалъя гэж хэлсэн байна. Заримд нь хамтдаа амиа егүүтгэе гэж ятгадаг байжээ.

2017 онд Токиогийн ойролцоо байдаг Зама хотод Хэллоуиний баяраар цагдаа нар Ширайшигийн гэрээс зэрэмдэглэсэн цогцос олсны дараа хэргийг илрүүлэх явц урагшилжээ. Өмгөөлөгчдийн хэлж байгаагаар хохирогч эмэгтэйчүүд өөрсдөө амиа алдахыг хүсч байсан тул хэрэгтний цаазын ялыг хөнгөлөх нь зүйтэй гэж үзсэн байна.

Гэвч Ширайши тэдний хүслийг үл харгалзан аллага үйлдсэн гэдгээ хүлээн зөвшөөрчээ. Тиймээс гэмт этгээдэд цаазын ял оноосон гэдгийг The Straits Times хэвлэлд нийтэлсэн байна.

Эх сурвалж: ВВС

---