2017 онд Иран улс даяар өрнөсөн эдийн засгийн эсэргүүцлийн жагсаалыг өдөөхөд тусалсан цахим ажлыг гүйцэтгэсэн сэтгүүлчийг өнгөрөгч бямба гарагт цаазалжээ.

Рухолла Зам өөрийн "AmadNews" вэбсайт, "Telegram" суваг дээрээ 2017 оны эсэргүүцлийн жагсаалын хуваарь болон тус улсын өндөр албан тушаалтнуудын талаар ичгүүртэй мэдээллийг тараасан байна. 2017 оны арванхоёрдугаар сарын сүүлчээр эхлэн, 2018 он хүртэл үргэлжилсэн эдгээр жагсаал нь 2009 оноос хойш Ираны эрх баригчдад тулгарсан хамгийн том сорилт байсан юм.

Бослогын шалтгаан нь анхандаа хүнсний бүтээгдэхүүний үнийн огцом үсрэлт байжээ. Ираны Ерөнхийлөгч Хассан Роуханигийн эсэргүүцэгчид Ираны зүүн хойд хэсэгт орших Машхад хотод анхны жагсаал цуглааныг өдөөж, олон нийтийн уур хилэнг Ерөнхийлөгч рүү чиглүүлэхийг оролдсон гэж олон хүн үздэг. Гэвч удалгүй эсэргүүцэл хотоос хот руу тархаж, ард иргэдийн уур бухимдал бүх эрх баригчдын зүг чиглэсэн байна.

47 настай Рухолла Зам нь Ираны тагнуулын ажилтнууд сүүлийн хэдэн сард хилийн чанадаас амжилттай барьсан сөрөг хүчний хэд хэдэн хүний ​​нэг аж. Парис хотод Францын Засгийн газрын хамгаалалтад амьдарч байсан Замыг хүчээр баривчлан, цаазалсан Ираны удирдлагууд олон улсын зүгээс хатуу шүүмжлэл амсаж байгаа юм.

Францын Гадаад хэргийн яам "Энэ бол харгис бөгөөд хүлээн зөвшөөршгүй үйлдэл. Энэхүү цаазаар авсан явдал нь Иран улс дахь үзэл бодлоо илэрхийлэх эрх чөлөө, хэвлэл мэдээллийн эрх чөлөөнд ноцтой цохилт боллоо" хэмээн мэдэгджээ. ХБНГУ-ын Гадаад хэргийн яамнаас Замыг ялласан нөхцөл байдал болон түүнийг "гадаадаас хулгайлсан" явдалд цочирдсоноо илэрхийлсэн байна.

Канад улс мөн Замыг цаазаар авсныг буруушаан, сэтгүүлчид "зайлшгүй шаардлагатай ажил" гүйцэтгэдэг хэмээн тэмдэглээд, "Иран улс хүний ​​эрхийг ноцтой зөрчсөнд Оттавагийн зүгээс хариуцлага тооцно" хэмээжээ.

Эх сурвалж: Associated Press

---