УИХ дахь АН-ын бүлэг хуралдаж хэд хэдэн асуудлыг хэлэлцжээ. Тухайлбал, Засгийн газрын шийдвэрийн талаар АН-ын бүлэг хурлаараа хэлэлцсэн байна. Ингээд Засгийн газраас авч хэрэгжүүлж буй шийдвэр нь зөв гэж дүгнэжээ.

УИХ дахь АН-ын бүлгийн дарга Д.Ганбат: Ардчилсан нам засаглаж байх хугацаанд Эрдэнэтийг буцааж авчирсны үндсэн дээр ийнхүү монголчуудад үр өгөөжөө өгч байна гэж манай бүлэг үзэж байна.
Одоо Засгийн газар малчдын талаар тодорхой арга хэмжээ авах ёстой. Мөн төмөр замын тээврийн асуудлыг шийдвэрлэх хэрэгтэй. Мөн манай бүлэг хурлаараа Шүүхийн тухай хууль, Тагнуулын тухай хуулиудыг авч хэлэлцсэн.

-УИХ-ын гишүүн Ж.Эрдэнэбатыг хорьсон асуудал дээр ОУПХ хэрэг үүсгэжээ. АН-ын бүлэг ямар байр суурьтай байна?

УИХ-ын гишүүн Н.Ганибал: УИХ-ын гишүүн Ж.Эрдэнэбатыг барьж, хорьсон асуудалд Ардчилсан нам анхнаасаа байр сууриа илэрхийлж байсан. Ардчилсан үнэт зүйл, хэм хэмжээг барьж ажиллах ёстой. Хууль зөрчин парламентын гишүүнийг барьж болохгүй гэж бид үзэж байна.

УИХ дахь АН-ын бүлгийн дарга Д.Ганбат: УИХ-ын гишүүний халдашгүй байдал гэж бий. Үүнийг зөрчсөн гэж бид үзэж байна. Халдашгүй байдлын дэд хороон дээрээ авч үзэх ёстой. Олонхийн бүлэг асуудал оруулах ёстой. Тухайн гишүүний бүрэн эрх хэрэгжиж байна уу, үгүй юу гэдгийг хөндөж, ярилцах ёстой гэж АН-ын бүлэг үзэж байна.

---