Нигери улсын баруун хойд хэсгийн Катсина мужийн дунд сургууль зэвсэгт этгээдүүдийн халдлагад өртөн, хэдэн зуун сурагч сураггүй алга болсон гэж орон нутгийн цагдаа нар мэдээлжээ.

"Канкара дахь Засгийн газрын Шинжлэх ухааны дунд сургууль руу баасан гарагийн орой "AK-47" буутай бүлэг дээрэмчид халдсан. Цагдаа нар халдагчдын эсрэг гал нээснээр зарим сурагчид сургуулийн хашааг даван, аюулгүй газарт хүрч чадсан" гэж Катсина мужийн Цагдаагийн газрын хэвлэлийн төлөөлөгч Гамбо Исах мэдэгдэлдээ дурджээ.

Тус сургууль 600 гаруй сурагчтай бөгөөд тэдний 400 орчим нь сураггүй алга болсон бол 200 нь албаныхны хамгаалалтад ороод байгаа аж. Одоо цагдаа нар, Нигерийн арми болон Нигерийн нисэх хүчин сураггүй алга болсон, эсвэл барьцаалагдсан сурагчдыг хайж олон, аврахаар ажиллаж байгаа гэнэ.

Нисэх хүчнийхэн болон цэргийнхэн дээрэмчдийг Канкара орчмын Занго ойд байрлаж байгааг тогтоосон бөгөөд гал нээн, аврах ажиллагааг хэрэгжүүлж байгаа хэмээн тус улсын Ерөнхийлөгч Мухаммеду Бухари мэдэгджээ. Одоогоор аврагдсан сурагч байгаа эсэх нь тодорхойгүй байна. 

Энэхүү халдлагыг Нигерийн баруун хойд хэсэгт үйл ажиллагаа явуулдаг хэд хэдэн бүлэг дээрэмчдийн нэг үйлдсэн гэж албаныхан үзэж байна. Энэ бүлгүүд иргэдийг барьцаалан, барьцааны мөнгө нэхдэгээрээ алдартай аж.

Эх сурвалж: AP

---