Австралийн зүүн эргийн мянга орчим км үргэлжлэх нутаг дэвсгэрт цаг агаарын онц ноцтой үзэгдэл тохиож, ширүүн бороо, хүчтэй салхи шуурч байна. Эргийн дагуу орших Брисбэн, Гөүлд Коаст хотуудад цахилгааны шонгууд унаснаар 2,000 айл гэрэл цахилгааны эх үүсвэргүй болжээ.

Далайн давлагаа найман метр өндөр хүрч давлагаалсан бөгөөд онцгой байдлын албанд ням гарагаас хойш 700 дуудлага ирсэн байна. Үерийн усанд боогдсон арав гаруй иргэний тэн хагасыг нь аварчээ.

Цаг уур судлаачдын зүгээс Австрали улсын нутаг дэвсгэрт энэ зун Ла Нина цаг уурын урсгал нүүрлэх ба энэ нь их хэмжээний хуртунадас унаж, халуун орны хуй салхинуудыг зөгнөж байна.

Күйнслэнд, Шинэ Өмнөд Уэльс мужуудын нутаг дэвсгэр дэх олон нийтийн амралтын бүс цаг уурын онц ноцтой үзэгдэлд өртжээ. Даваа гараг гэхэд далайн эргийн амралтын газруудыг хааж, аюулгүй байдлыг хамгаалсан байна. Күйнслэнд болон Шинэ Өмнөд Уэльс мужуудын хоорондын хилийг цар тахлын үед хааж, дахин нээгээд байсан юм.

Австралийн цаг уурын товчооноос цаг агаарын онц үзэгдэл Күйнслэнд мужийн Хэрви Бэй-ээс Шинэ Өмнөд Уэльс мужийн Тари хот хүртэл нутаг дэвсгэрийг хамарч үргэлжилсэн гэж мэдээлэв. Мягмар гарагийн орой, лхагва гарагийн өглөө ширүүн бороо, хүчтэй салхи намжина гэж цаг уур судлаачид таамаглаж байна.

Эх сурвалж: ВВС, The Guardian

---