Нидерландын тагнуулын агентлаг тус улсын шинжлэх ухаан, технологийн салбарыг онилж байсан ОХУ-ын хоёр тагнуулыг илрүүлсэн гэж өнгөрөгч пүрэв гарагт мэдэгджээ. Уг хэргийн улмаас хоёр улсын хурцадмал харилцаа улам дордох магадлалтай байгаа юм.

Тагнуулчид Оросын элчин сайдын яаманд ажилладаг бөгөөд дипломат магадлан итгэмжлэлтэй байсан гэж Нидерландын Тагнуул, аюулгүй байдлын ерөнхий газраас мэдэгджээ. Харин одоо тус улсын Гадаад харилцааны яамнаас тэднийг дахин дипломат ажил хийхийг хориглосон бөгөөд Нидерландаас гарахыг шаардсан байна.

"Бид тагнуулыг илчлэх зорилгоор нууц мэдээлэл цуглуулж, эдгээр мэдээллийг ашиглан улс орныхоо стратегийн ашиг сонирхлыг хамгаалдаг. Ийм аргаар бид энэ удаагийнх шиг тагнуулын оролдлогыг таслан зогсоодог" гэж Тагнуул, аюулгүй байдлын ерөнхий газрын Ерөнхий захирал Эрик Акербум онцолжээ. 

ОХУ-ын ахлах тагнуулч хиймэл оюун ухаан, хагас дамжуулагч болон нанотехнологийн талаар мэдээлэл хайж байсан гэнэ. "Энэ технологи нь иргэний болон цэргийн хэрэглээнд ашиглагддаг бөгөөд үүнд зэвсэглэлийн систем ч багтана" гэж албаныхан тэмдэглэсэн юм.

Түүнчлэн тагнуулчид хоёул Оросын Гадаад тагнуулын албанд ажилладаг байсан бөгөөд тэдний нэг нь Нидерландын дэвшилтэт технологийн салбарт ажилладаг эсвэл ажиллаж байсан эх сурвалжуудын сүлжээг бүрдүүлсэн бол хоёр дахь офицер нь туслах үүрэг гүйцэтгэж байжээ.

Эх сурвалж: Associated Press

---