Ардчилсан намаас хүний эрхийн зөрчилтэй холбоотой цаг үеийн асуудлаар мэдээлэл хийлээ. Хэвлэлийн хуралд АН-ын ХЭГ-ын дарга П.Нүрзэд, УИХ-ын гишүүн асан Б.Оюунгэрэл, хүний эрхийн хуульч Р.Булгамаа нар оролцов. 

АН-ын ХЭГ-ын дарга П.Нүрзэд: 

-Цар тахлаар далимдуулан барьж хорьдог, хүний эрх зөрчдөг, амь насыг нь хохироодог үйлдлээ зогсоохыг АН эрх баригчдаас шаардаж байна. Үг хэлэх эрх чөлөөгөө эдэлсэн сэтгүүлчдийг өнөөдөр баривчлан саатуулсан байна. Өнөөдөртөө багтаж сулла. 

Цар тахлаар нэг ч хүн нас бараагүй байхад УОК-ын ажлын хариуцлагагүй байдлаас болж иргэд амь насаа алдан, хүний эрх зөрчигдөж байна. 

УИХ-ын гишүүн асан Б.Оюунгэрэл: 

-Ардчилсан намын 30 жилийн турш тэмцэж ирсэн хүний эрх рүү Хүний эрхийн өдөр халдлаа. Нэгд, баривчилсан иргэдийг өнөөдөртөө багтааж суллахыг бид шаардаж байна. 

Мөн, цар тахлын төлөвлөгөө алга байгаа нь 22-ын товчоонд нэгэн эх нас барж, ковидын шинжилгээ өгсөнгүй хэмээн эцэг, эхтэй нь уулзуулаагүй арван настай охины үхэл харууллаа. Төлөвлөгөөгөө танилцуулахыг эрх баригчдаас шаардаж байна. Гуравдугаарт, хүнсний ногооны нөөц, бизнес эрхлэгчдийн үйл ажиллагааг жигдрүүл. 

Хүний эрхийн хуульч Р.Булгамаа: 

-Эрх баригчдын өөрчлөгдсөн шийдвэр бүр цаанаа иргэн хүний амь амьдралд нөлөөлж байна. Эрүүл, аюулгүй орчинд амьдрахаас гадна иргэдийн амьд явах, үг хэлэх эрх чөлөө зөрчигдөж байна. Ардчилсан намд хуульчдын баг ажиллаж байгаа. Эрх нь зөрчигдсөн хүн бүрт хүрч үйлчилнэ. 

---