Эрүүл мэндийн яамнаас энэ сарын 7-нд коронавирусийн тархалтын мэдээлэл хийхдээ "Улаанбаатар хотод 32 тохиолдол илэрсэн. Батлагдсан тохиолдлын 29 нь ойрын хавьтлаар тусгаарлагдсан болон тэдний гэр бүлийн хүмүүсээс илэрсэн” хэмээн ерөнхий мэдээлэл өгсөн. Гэтэл батлагдсан 29 тохиолдол нь Баянгол дүүргийн Хорооллын эцэст байрлах “Алтай” зочид буудалд тусгаарлагдаж байсан иргэдээс халдвар илэрсэн гэх мэдээлэл цацагдах болсон.

Энэ талаар ХӨСҮТ-ийн Тандалт, судалгааны албаны дарга А.Амбасэлмаа: “Алтай” зочид буудалд байрласан 20 хүнээс халдвар илэрсэн. “Алтай” зочид буудалд батлагдсан дөрвөн тохиолдлын ойрын хавьтлуудыг тусгаарласан байсан. Тусгаарлахдаа хүн бүрийг нэг нэгээр нь гэр бүлийн хүмүүсийг гэр бүлээр нь тусгаарласан. Ингээд зургаан гэр бүлийн хүмүүс өвчилсөн. 14 хоног тусгаарлана гэдэг маань энэ хугацаанд халдвар илэрч болох нууц үеийн хугацаанд эрсдэл байна гэж ойрын хавьтлыг тусгаарладаг.

Зургаан гэр бүлийн 20 хүн халдвар илэрсэн. Эдгээр гэр бүлийн хүмүүс нэг нэгээрээ,  хоёр хоёроороо халдвартай хүнтэй хавьтал болсон хүмүүс юм.

“Алтай” зочид буудлыг өмнө тусгай үүргийн онгоцоор ирж байсан хүмүүсийг тусгаарлаж байсан. Халдвар илэрсэн нь “Алтай” зочид буудлаас биш халдвартай иргэдийн ойрын хавьтлуудыг тусгаарласан учраас хоёр, гурав дахь шинжилгээгээр халдвар илэрсэн хэмээв.

---