ХБНГУ-ын санхүүгийн нийслэл Франкфурт хотод хийгдэж байсан барилгын ажлын үеэр Дэлхийн хоёрдугаар дайны үеийн тэсрэх бөмбөг олдсон бөгөөд шинжээчид уг 500 кг жинтэй тэсрэх бөмбөгийг өнгөрөгч ням гарагт амжилттай аюулгүй болгон, устгалд оруулжээ.

Уг ажлын хүрээнд хотын Галлус дүүргийн 13 мянга орчим оршин суугчийг нүүлгэн шилжүүлсэн ба мэргэжилтнүүд бөмбөгийг саармагжуулах үеэр бүс нутгийн галт тэрэгний хөдөлгөөнийг зогсоосон байна. Тэсрэх бөмбөгийг өнгөрсөн долоо хоногийн пүрэв гарагт олж илрүүлсэн бөгөөд бөмбөгийг аюулгүй болгоход дор хаяж зургаан цаг шаардагдана гэж шинжээчид тооцоолж байсан хэдий ч тэд ажлаа хоёр цагийн дотор дуусгасан гэнэ.

Ням гарагийн орой гэхэд галт тэрэгнүүд дахин хөдөлгөөнд орсон бөгөөд оршин суугчид гэртээ эргэж очих боломжтой болсон байжээ. Ажиллагааны үеэр найз нөхөд, гэр бүл дээрээ байрлах боломжгүй байсан 700 орчим хүнийг Франкфуртын чуулганы төвд байрлуулсан байна.

Хэдий Дэлхийн хоёрдугаар дайн дууссанаас хойш 75 жил өнгөрөөд байгаа ч гэсэн Германд ийм төрлийн олдвор олдох нь харьцангуй түгээмэл байдаг аж.

Эх сурвалж: Associated Press

---