ЭМЯ-аас коронавирусийн нөхцөл байдлын талаарх 11:00 цагийн ээлжит мэдээллээ танилцууллаа. 

ХӨСҮТ-ийн Тандалт судалгааны албаны дарга А.Амбасэлмаа: "2020 оны арванхоёрдугаар сарын 5-нд 14,019 хүнд шинжилгээ хийхэд 700 хавьтлын хүний долоод нь коронавирусийн халдвар илэрсэн. Үүнээс Сэлэнгэ аймгийн кластерын ойрын хавьтлаас дөрвөн шинэ тохиолдол, Дорноговь аймгийн Замын-Үүд суманд гэр бүлийн гурван шинэ тохиолдол бүртгэгдсэн.

Харин Улаанбаатар хот, Архангай, Говьсүмбэр, Орхон, Дархан-Уул аймагт халдварын шинэ тохиолдол илрээгүй. 

Улсын хэмжээнд кластер голомтоос гарсан тохиолдлын тоо 404 болж, зөөвөрлөгдөн орж ирсэнтэйгээ нийлээд 849 болжээ. Үүнээс эдгэрсэн 384, ажиглалтад 49, гэрийн хяналтад 13, ажиглалт, тандалт нь дууссан 322, нутаг буцаасан есөн хүн байгаа.

Сүүлийн 24 цагт ХӨСҮТ-ийн Халдвартын клиникээс 16 хүн эмчлэгдэж, дараагийн сувилалд шилжсэн. Үүний 13 нь голомтолсон халдвараас эдгэрсэн хүмүүс юм. 

Цэргийн төв эмнэлэг, ХӨСҮТ болон Сэлэнгэ аймгийн нэгдсэн эмнэлэгт нийтдээ 456 хүн эмчлүүлж байна. Эдгээрээс маш хүнд гэсэн оноштой хоёр, хүнд дөрөв, хүндэвтэр 68, хөнгөн 382 хүн байна.

Мөн ХӨСҮТ-ийн сүрьеэгийн эмчээс коронавирусийн халдвар илэрсэн гэдэг бол албан бус мэдээлэл. Тус эмчийн эхний шинжилгээний хариу эргэлзээтэй гарсан. Харин асуумжийн дагуу энэ эмч батлагдсан тохиолдолтой ямар ч холбогдол байхгүй нь тогтоогдсон. Өнөөдөр уг эмчийн баталгаажуулах шинжилгээний хариу "Сөрөг" гарсан.

Баянзүрх зах болон Сансарын Имарт худалдааны төвд халдварын сэжигтэй тохиолдол гарсан гэж үзэн, тандалтын зорилгоор шинжилгээ хийсэн. 500 гаруй хүнээс шинжилгээ аваад байгаа. Цаашдаа бүх хүнсний худалдаа үйлчилгээний төвийн томоохон цэгүүдээс тандалтын сорьц авах зорилготой байгаа" гэв.

ЭМЯ-ны албаны дарга Д.Нарангэрэл: "Нийт есөн кластер голомтод ойрын хавьтлын 4,325 хүнийг хяналтдаа авч, тандалт судалгаа хийж байна. Улсын хэмжээнд нийт оношилгооны цэгээр 298,951 хүн коронавирус илрүүлэх шинжилгээнд хамрагдсан.

Есөн кластер голомтын ойрын хавьтлыг 100 хувь шинжилгээнд хамруулаад байгаа. Автобусны жолоочийн ойрын хавьтлыг ч мөн 100 хувь тогтоож, шинжилгээнд бүрэн хамруулаад байна" хэмээв.

Онцгой байдлын ерөнхий газрын дэд дарга, хурандаа Б.Ууганбаяр: "Төв аймгийн Заамар сумын бичил уурхайд архи уусан гэсэн асуумжтай долоон хүнтэй холбоотой золгүй тохиолдлын мэдээлэл өчигдөр ирсэн. Үүнээс нэг хүн бичил уурхайн газар дээр, гурван хүн тус сумын эмнэлэг дээр ирээд нас барсан. Үлдсэн гурван хүн нь улсын нэгдүгээр төв эмнэлэг дээр ирээд эмчлүүлж байгаа бөгөөд тэдний нэгнийх нь биеийн байдал тун тааруу байгаа. Эдгээр хүмүүс техникийн спирт хэрэглэсэн нь тогтоогдсон" гэлээ.

---