1974 оноос 1981 он хүртэл Францын Ерөнхийлөгчөөр ажиллан, Европын нэгдэлд том хувь нэмэр оруулсан Валерий Жискар д’Эстэн коронавирусийн хүндрэлээр таалал төгсжээ. Тэрээр 94 настай байсан юм.

Жискар д’Эстэн коронавирусээр өвчлөөд байсан бөгөөд өнгөрөгч лхагва гарагт Францын төв хэсэгт байрлах гэртээ таалал төгссөн болохыг түүний ажлын албанаас мэдээлжээ. Тэдний албан ёсны мэдэгдэлд "Ерөнхийлөгч асны хүслийн дагуу түүний оршуулга олон нийтэд хаалттай явагдах болно" хэмээн тэмдэглэсэн байна.

Дэлхийн I дайны дараа Германд төрсөн Валерий Жискар д’Эстэн Дэлхийн II дайны үеэр Парисыг нацистуудаас чөлөөлөхөд тусалжээ. Тэрээр мөн еврогийн валютын үндэс суурийг тавьж, 1970-аад онд Их Британи улсыг одоогийн Европын холбоо болох нэгдэлд элсэхэд тусалсан аж.

Ингээд 1974 онд Ерөнхийлөгчийн албан тушаалд томилогдохдоо тэрээр Францын орчин үеийн Ерөнхийлөгчийн үлгэр жишээ байсан юм. Жискар д’Эстэн нийгмийн асуудал дээр либерал үзэлтэй консерватив үзэлтэн байжээ. Тэрээр бүрэн эрхийн хугацааныхаа үеэр үр хөндөлт болон харилцан тохиролцооны үндэс дээрх гэр бүл цуцлалтыг хуульчилж, насанд хүрсэн гэж тооцох насыг 21-ээс 18 болгож бууруулсан байна.

Францын Ерөнхийлөгч асан Валерий Жискар д’Эстэны таалал төгссөн мэдээг сонссон одоогийн Ерөнхийлөгч Эммануэль Макрон ирэх баасан гарагт "Brut" мэдээллийн сайттай товлоод байсан ярилцлагаа хойшлуулжээ.

Эх сурвалж: Associated Press, Reuters

---