Ковид 19 жирэмсэн эмэгтэйчүүдэд хэрхэн нөлөөлдөг талаар АШУҮИС-ийн Эх барих эмэгтэйчүүд судлалын тэнхимийн эрхлэгч АУ-ны доктор, дэд профессор Д.Мөнхцэцэгтэй ярилцлаа.

Дэлхийн олон орны хэдэн зуун бие давхар эмэгтэйчүүдийн дунд энэ вирусээр өвчилбөл биед болон урагт ямар нэгэн өөрчлөлт гардаг эсэхийг судалж байна. Ямар ч эмэгтэй хүн жирэмсэн болсноор дархлааны системд нь зохих өөрчлөлтүүд ордог. Бие давхар эмэгтэйн дархлаа амархан дордож, эмзэг болдог тул ямарваа нэг өвчин тусах магадлал өндөрсдөг нь үнэн. Учир нь жирэмсэн эмэгтэйн биед гормоны болон дааврын өөрчлөлтүүд тасралтгүй явагдаж байдаг.

Жирэмсэн эмэгтэйчүүд халдвар авах юм бол хүндрэх эрсдэл харьцангуй өндөр. Амьсгалын замын дутагдалд, амьсгалын аппарат орох нь илүү өндөр байна. Түүнчлэн тухайн эмэгтэй хавсарсан өвчтэй байх юм бол илүү хүндрэлтэй болохыг эрдэмтэд дурдаж байгаа.

Эмэгтэйчүүдийн хувьд хөл хориотой энэ үед эмнэлэгтээ очиж чадахгүй болов уу. Эмнэлгийн байгууллага халдвар, хамгааллын дэглэм сахиж байгаа болов уу гэдэг дээр санаа зовох зүйлгүй. ДЭМБ-ын өгсөн удирдамжийн дагуу эрүүл мэндийн байгууллагууд бэлэн байдлын зэрэгт ажиллаж байгаа. Хамгийн гол нь эмнэлгийн байгууллагаар үйлчлүүлэхээр бол халдвар, хамгааллын дэглэмээ баримтлах хэрэгтэй. Сэтгэл санаагаа өөдрөг байлгаж, дархлаагаа дэмжихийг хүсэж байна. Түүнчлэн жирэмсэн эмэгтэйчүүд Д, С аминдэмийг эмчийн заавраар хэрэглэхийг зөвлөж байна.

Жирэмсэн үедээ халдвар авсан бол ургийн хөгжилд нөлөөлдөг эсэх нь дэлхий дахинд батлагдаагүй байгаа. Мөн халдвар авсан ч хүүхдээ хөхөөр хооллож болно. Манай улсад дотоодын халдвар гарсантай холбогдуулан жирэмсэн байх үедээ халдвар авсан бол хэрхэн тусгаарлан ажиглах талаар заавар зөвлөмж гарсан. Ковид-19 халдвартай эмэгтэй аймгийн халдвартын тасаг, ХӨСҮТ-ийн төрөх тасагт төрнө. 

---