УИХ-ын гишүүн Д.Сумъяабазар Улаанбаатар хотын захирагч болж гишүүний бүрэн эрхээсээ татгалзсанаар тус тойрогт нөхөн сонгууль явуулах шаардлага үүсээд буй. Харин нөхөн сонгуулийн товыг УИХ-ын чуулганаар хэлэлцэж тогтоох ёстой.

Түүнээс өмнө буюу өчигдөр/2020.12.02/ Төрийн байгуулалтын байнгын хорооны хуралдаанаар нөхөн сонгуулийн тов тогтоох асуудлыг хэлэлцэх байсан ч УИХ дахь МАН-ын бүлгийн дарга Д.Тогтохсүрэн түр хойшлуулах санал гаргаж, дэмжигдсэн юм.

Хууль ёсоор бол нөхөн сонгуулийг хавар 06-р сард эсвэл намар 10-р сарын аль нэгэнд зохион байгуулах зохицуулалттай. Тэгвэл ирэх оны 06-р сард зохион байгуулах болов уу гэсэн хүлээлт нийгэмд байна.

Нөхөн сонгуулийн сургаар зарим нэр дэвшигчдийн нэрс тодорж эхэлжээ. Юун түрүүнд НИТХ-ын төлөөлөгч асан С.Мөнхчулуун СХД-ийн нөхөн сонгуульд хүч үзэх гэнэ.

Түүний хувьд өнгөрсөн 10-р сард болсон НИТХ-ын сонгуульд СХД-ээс бие даан нэр дэвшихээр гарын үсэг цуглуулж байсан ч гэнэт нэрээ татсан. Тэрээр тухайн үед ямар шалтгаанаар нэрээ татсанаа тодорхой тайлбарлаагүй өнгөрсөн юм.  

Юутай ч түүнийг нэрээ татсаны дараахан танхай болон хар тамхины хэргээр ял эдэлж байсан төрсөн дүү С.Бямбацогтыг нь хугацаанаас нь өмнө сулласан байдаг. Түүний дүү С.Бямбацогт 2017 онд бааранд сэлэм эргүүлж танхайрсан болон хар тамхи хэрэглэсэн гэх хэргээр ял эдэлж байсан юм.   

---