Цахим орчинд самарчид идэш тэжээлийг нь цөлмөсний улмаас хэрэм олноороо үхэж байгаа тухай зураг, мэдээлэл тархах болсон. Бид үүнийг тодруулахаар Богд хан уулын ТХГ-ын Байгаль хамгаалагч Б.Эрдэнэбаттай ярилцлаа. 

Ер нь самар бэлтгэдэг иргэд хог тарьж, ан амьтдыг дайжуулдаг. Архины шил, гялгар уут гэх мэт маш их хогоор ой модыг бохирдуулж байгаад байгаль хамгаалагчид төдийгүй хүн бүр санаа тавих хэрэгтэй болжээ. Мөн, самарчдын хөл хөдөлгөөнөөс болж амьтад дайждаг бөгөөд хэрэм ч мөн идэш тэжээл хайж газар нутгаа сэлгэдэг аж. 

Богд хан уулын ТХГ-ын Байгаль хамгаалагч Б.Эрдэнэбат:

-Самарчид зөвхөн хэрэм гэлтгүй ойн зэрлэг бүх ан амьтанд бэрхшээл тарьж байна. Маш их дуу чимээ гаргаж, тайван байдлыг нь алдагдуулдаг. Үргэж дайжихад хүргэдэг. Ойд маш их хог тарьдаг, архидан согтуурдаг. Энэ жил бид 3-4 удаа Богд уулнаас иргэдийг буулгасан. Отгийг нь буулгаж, хогийг нь цэвэрлүүлсэн. Гэвч хог хэвээр л байна. 

Хэрэм сонин амьтан. Сууж байгаа нь хүртэл залбирч байгаа юм шиг байдаг. Түүнтэй холбоотой олон домог яриа байдаг. Нэг анчин хэрэм буудтал хөлийг нь шархдуулж орхиж. Хэрэм модны хөндий рүү орчихоор нь ухаад гаргаад иртэл шархадсан хөлөө давирхайдсан байсан гэдэг. Ийм л хөөрхөн амьтан шүү дээ. 

---