Нийтэлсэн:   З.Балдандугар

3 жилийн өмнө

Замын хөдөлгөөний төлөвлөлт, зохицуулалт, инженерчлэлийн газар (ЗХТЗИГ)-ын дарга, НОК-ын гишүүн С.Энхтөр замын хөдөлгөөнд оролцох QR код олголтын талаар мэдээлэл хийлээ.

ЗХТЗИГ-ын дарга С.Энхтөр:

Нийслэлийн Засаг даргын А/1252 тоот захирамжийн дагуу 13 чиг үүргийн байгууллагын албаны автомашин, тухайн байгууллагад ажилладаг хүмүүсийн хувийн автомашиныг QR кодын зөвшөөрөл авсан тохиолдолд замын хөдөлгөөнд орохыг зөвшөөрсөн.

Зөвхөн өчигдөр л гэхэд 13 чиг үүргийн 2741 тээврийн хэрэгсэл QR код бүхий хөдөлгөөнд оролцох зөвшөөрлийг шинээр авсан. Гамшгаас хамгаалах бүх нийийн бэлэн байдлыг зарласнаас хойш 22,357 тээврийн хэрэгсэлд QR кодыг авч хөдөлгөөнд оролцож байна. Иргэн, аж ахуйн нэгж байгууллагаас 3108 имэйл хаяг ирснийг бүгдийг нь хангаж шийдвэрлэсэн. Харин аж ахуйн нэгжүүд мэдээллээ дутуу ирүүлсэн, автомашины сери дугаараа буруу ирүүлсэн тохиолдолд хүсэлтийг нь буцаасан.

Хөдөлгөөний хязгаарлалт тогтоохгүй чиг үүргийн 13 байгууллагаас хамгийн олон буюу 10,250 ширхэг QR кодыг хүнсний үйлдвэрлэлт, тээвэрлэлтийн үйл ажиллагаа явуулах чиглэлээр авсан байдаг.

Мөн жижиглэн худалдаа эрхэлдэг хүмүүс, хүнсний дэлгүүр ажиллуулдаг хүмүүс хувийн автомашинаараа тээвэр хийх тохиолдол их байгаа учраас дээрх хүмүүсийн автомашинд QR код олгох ажлыг маргаашнаас тодорхой тоон хязгаартайгаар олгож эхэлнэ.

Мөн яаралтай эмнэлгийн тусламж үйлчилгээ авах зайлшгүй шаардлага гэнэт тулгарсан иргэдийг цагдаа нар замын хөдөлгөөнд оролцуулж байгаа. Эмнэлгийн аппаратад хуваарийн дагуу ордог иргэд эмнэлгийн бичгээ үзүүлээд замын хөдөлгөөнд оролцох боломжтой.

Хөдөлгөөний эрчим Улаанбаатар хотод маш сийрэг, автомашины дундаж хурд 35-45 км/ц байгаа нь тогтоогдсон. Сүүлийн үед цас орж, халтиргаа гулгаа нэмэгдсэн учраас автомашиныхаа хурдыг тохируулж хөдөлгөөнд оролцохыг анхааруулж байна.

Сурталчилгаа