УИХ-ын Түр хороо хуралдаж байна.

УИХ-ын гишүүн Б.Дэлгэрсайхан “Г.Дөлгөөн, Н.Баярсайхан хоёроос хоёр асуулт асууя. Иргэд бичээд байна. Ипотекийн зээлийн хүүг хойшлуулсныг сайшааж байгаа. Хэдийгээр аж ахуйн нэгжийн авсан арилжааны зээлийг царцаасан ч хүүгээ нэхээд байна гэдэг асуудал яригдаж байна. Банканд, хувь хүнд хаана хаана хэцүү байгааг ойлгож байна. Хонь ч хөөрхий, чоно ч хөөрхий гэдэг шиг. Тийм учраас онцгой цаг үе гэж үзээд хадгаламжийн хүүгээ зогсоочихвол яадаг юм бэ. Гурван сар ч юм уу хагас жилээр. Сая та хэллээ “20-30 хувь бараг тэрбум төгрөгийн хадгаламжтай” гэж. Эд нар мэдээж мөнгөө аваад, тийм амархан гудасны завсраа хийчихдэг үе өнгөрсөн байх. Цаг үе өөр болсон. Түрүүн Ж.Ганбаатар гишүүн хэлдэг үнэн шүү дээ. Тэгэхээр өртөг бүрдүүлж буй зээлийн хүү буурна.

Зээлийн хүү буурахаар аж ахуйн нэгжид хөнгөн тусна. Аж ахуйн нэгжүүдийн үйл ажиллагаа таг зогссоор байна гэдэг дээр онцгой ач холбогдол өгч ажиллаач ээ.

Мөн арилжааны банкууд гаднаас зээл авахад Монголбанк хууль эрх зүйн хувьд яаж дэмжлэг үзүүлж байна вэ. Засгийн газар бүх юмыг даах боломж байхгүй. Тийм учраас зээлийн хүүг бууруулах ганц боломж нь хадгаламжийг хүүгүй болгох. Гадаадын оронд мөнгөө хадгалуулахын төлөө банкинд шимтгэл төлдөг. Гэтэл манайд эсрэгээрээ банк нь оршин тогтнохын тулд хүү амлаад буй нь буруу” гэлээ.

Үүнд “Монголбанк”-ны дэд ерөнхийлөгч Г.Дөлгөөн хариулахдаа “Гадаадын орнуудын таны ярьсан жишээ Монголын эдийн засгийн тогтолцооноос өөр. Хамгийн гол харах зүйл инфляци, ханшийн сулралт. Энэ хоёр дээр нэлээд оноо алддаг. Тэр тусмаа Монголын төгрөгийн зөрүү тэр дүнгээрээ хувирч, зардал болж гардаг.

Арилжааны банкууд гаднаас эх үүсвэр олох ажил тогтмол хийж байгаа. Монголбанк своп гэрээ тогтмол хийсээр байна.

Хадгаламжийн хүүг зогсоох асуудалд төв банк маш болгоомжтой хандаж байгаа. Хадгаламж эзэмшигчдийн нуруун дээр үүрүүлбэл банкны систем дээр доголдож, системээ татаж унагаах эрсдэл үүснэ” гэлээ.

Б.Дэлгэрсайхан “Монголбанк”-нд зөвлөхөд та нар одоо зоригтой алхам хий. Ингээд тайлбар тавиад л байвал бид сонссон болоод, та нар тодорхой шийдвэр гаргахгүй өнгөрнө. Хайран цаг.

Н.Алтанхуяг гишүүний хэлсэн үнэн. Эрсдэлээс айгаад байвал та нар юу ч хийж чадахгүй. Тиймээс хадгаламжийг хүүг зогсоо. Гурван сар байна уу, зургаан сар байна уу. Тэгээд үзье л дээ. Бэлэн мөнгөө өвөртлөөд, гудсан доороо хонуулдаг байсан үе одоо өнгөрсөн. Нэг удаа зогсоогоод үзье” гэлээ.

---