Олон улсын хөлбөмбөгийн холбоо FIFA Гайти улсын хөлбөмбөгийн холбооны Ерөнхийлөгч Ив Жан Бартыг бүх насаар нь спортын арга хэмжээнд оролцохыг хоригложээ. Түүнийг залуу тамирчдад бэлгийн дарамт үзүүлсэн, хүчирхийллийн шинж чанартай үйлдэл гаргасан болохыг өнгөрсөн хагас жилийн турш үргэлжилсэн мөрдөн шалгах ажиллагааны дүнд тогтоосон байна.

Энэ жилийн тавдугаар сард Жан Барт буюу Дабу хочит Ерөнхийлөгчийг FIFA олон улсын мөрдөн шалгах ажил эхэлж байгаатай холбогдуулан түр хугацаанд алба үүргээс нь түдгэлзүүлээд байсан юм. Харин энэ сарын 18-ны өдөр олон улсын мөрдөн шалгах ажлын дүнгээр түүнийг гэм буруутай болохыг тогтоосон тул бүх насаар нь спортын арга хэмжээнээс хориглох шийдвэрээ өнгөрсөн баасан гарагт танилцуулжээ.

FIFA-ын Ёсзүйн хороо “Жан Барт нь өөрийн байр суурийг ашиглан 2014-2020 оны хооронд эмэгтэй тамирчид төдийгүй насанд хүрээгүй өсвөрийн тоглогчдод бэлгийн дарамт үзүүлж Олон улсын хөлбөмбөгийн холбооны ёсзүйн хууль дүрмийг зөрчсөн” хэмээн мэдэгджээ. Тиймээс түүнийг Гайти улсад болон олон улсын тавцанд хөлбөмбөгтэй холбоотой спортын бүх төрлийн арга хэмжээнээс бүх насаар нь хориглох шийдвэрт хүрсэн байна. Түүнчлэн нэг сая швейцарь франк буюу 1,1 сая ам.доллараар торгохоор болжээ.

Жан Бартын хэвлэлийн төлөөлөгч Эван Ниерманы хэлснээр FIFA үнэнийг гуйвуулсан ба улс төржсан шийдвэр гаргаж, мөрдөн шалгах ажлыг дутуу дулимаг явуулсан учир буруугүй гэдгээ батлахын тулд давж заалдах шатны шүүхэд, тодруулбал Спортын арбитрын шүүхэд хандана гэжээ.

Эх сурвалж: CNN

---