Дэлхийн католик сүм хийдийн тэргүүн Ромын пап Францисын албан ёсны Инстаграм хаягнаас Бразилийн дотуур хувцасны загвар өмсөгч бүсгүйн нүцгэн шахуу зурганд like даржээ. Үүний дараа Бразилийн загвар өмсөгч Наталиа Гариботто Ромын пап like дарсан зургийг дагагчидтайгаа хуваалцан “би лав диваажинд очих бололтой” хэмээн хошигножээ.

Харин энэ явдалд Ватиканы зүгээс Инстаграмаас тайлбар хийхийг шаардаж байна. Биеийнхээ ихэнх хэсгийг ил гаргасан модель бүсгүйн зурганд Ромын пап like дарсан зураг албан ёсны хаяг нь мөн эсэх батлагдаагүй гэж зарим эх сурвалж зарлажээ. Мөн энэ сарын 13-ны өдрийг хүртэл папын хаяг like дарсан хэвээр байсан ч маргааш өдөр нь like – аа буцаасан байна.

Гариботтогийн харьяалагддаг COY компаниас энэ зургийг дахин нийтэлж, “бид ромын папын албан ёсны адислалыг хүртсэн” хэмээн олон нийтэд зарлажээ. Гариботто нь Бразилд алдартай загвар өмсөгч бөгөөд Инстаграмдаа 2,4 сая дагагчтай байна.

Ватиканы хэвлэлийн эх сурвалжийн мэдээлснээр чухам яагаад папын албан ёсны хаягнаас like дарагдсан байсныг тодруулахаар мөрдлөг шалгалтыг үргэлжлүүлж байна гэжээ. Дэлхийн католик сүм хийдийг тэргүүлэгч Инстаграмд л гэхэд 7,4 сая дагагчтай. Гэхдээ папын нэрийг ашигласан олон хуурамч хаяг байдаг. Пап өөрийн албан ёсны хаягаа Трамп шиг ашигладаггүй, маш цөөн удаа контент оруулдаг ч 2017 онд түүнийг Твиттерт 10 гаруй сая хүн дагаж цахим сүлжээнд хамгийн нөлөө бүхий удирдагчаар нэрлэж байжээ.

Эх сурвалж: The Guardian

---