Баянзүрх дүүргийн Засаг дарга Н.Баярмөнх өнөөдөр захирамж гаргаж, Гамшгаас хамгаалах хуулийн дагуу тус дүүргийн 4,9,26 дугаар хорооны нутаг дэвсгэрт хэсэгчилсэн дэглэм тогтоохоор шийдвэрлэсэн байна. 

Цар тахлын сэжигтэй тохиолдол илэрсэн учир Улсын онцгой байдлын өгсөн үүрэг чиглэлийн дагуу энэхүү захирамжийг гаргаснаа мэдэгджээ. 

Энэ талаар бид тус дүүргийн Засаг дарга Н.Баянмөнхөөс тодруулахад, 

-Маргааш нөхцөл байдал хэрхэн өөрчлөгдөхийг би хэлж мэдэхгүй байна. Яг одоогоор 4 ба 9 дүгээр хорооны иргэнээс ПСР буюу лабораторийн шинжилгээгээр халдвар тогтоогдсон учир хамгаалалтад аваад байна. 4 дүгээр хорооны 3-р байрны подвальд амьдарч байсан иргэнээс халдвар илэрсэн. Харин 6 ба 26-р хорооны тохиолдлууд түргэвчилсэн оношлуулаар илэрсэн, лабораторийн шинжилгээгээр эцэслэгдээгүй байгаа. 

-Хамгаалалт гэхээр орох, гарах хөдөлгөөнийг бүрэн хаасан гэсэн үг үү? 

-Үгүй. Иргэд буруу ойлгоод байх шиг байна. Хот даяар хөл хорио тогтоосон байгаа учир дүүргээс өргөн хүрээнд хамгаалалтад гарсан зүйлгүй. Харин жижиг хэмжээний хаалт хийсэн байдалтай байна гэлээ.

---