Онцгой байдлын ерөнхий газарт гал түймэр, эрэн хайх, аврах тус тус нэг дуудлага иржээ. 

Тухайлбал, Өмнөговь аймгийн Цогтцэций сумын (Тавантолгой) Сийрст багийн “Хар толгой” нуурын усанд Цогт-Овоо сумын харьяат иргэн Т /35 настай, эрэгтэй/ мал усалж байгаад живсэн тухай дуудлага өчигдөр 12:10 цагт иржээ. Тус аймгийн Онцгой байдлын газар, тус сум дахь Цагдаагийн хэсгийн алба хаагчид "Энержи ресурс" ХХК-ийн ажилтнууд 25 км зам туулан 12:55 цагт очиж нуурын эргээс 5 метр, 5 метрийн гүнээс цогцсыг гаргаж Цагдаагийн байгууллагад шилжүүлэн өгсөн.

Нийслэлийн Сонгинохайрхан дүүргийн 3 дугаар хорооны “Бага наран”-гийн 34 дүгээр гудамжинд бага насны хүүхэд угаалгын машины сэгсрэгчид хөлөө хавчуулсан тухай дуудлага иржээ. Нийслэлийн Аврах ангийн 105-ын алба хаагчид 11 км зам туулан 22:45 цагт очиж Т /4 настай, эрэгтэй/ хөлөө угаалгын машины сэгсрэгчид хавчуулсан байсныг гаргасан. 

---