АНУ-ын эм үйлдвэрлэгч Модерна компани коронавирусийн эсрэг 95 хувийн үр дүнтэй вакцин гаргаж авсан тухай дэлхий даяар мэдээлж байна. Хэдхэн хоногийн өмнө АНУ-ын Pfizer, ХБНГУ-ын BioNTech фирмүүдийн хамтарсан вакцин 90 хувийн үр дүнтэй байгааг мэдээлсэн бол ОХУ-ын үйлдвэрлэсэн вакцин коронавирусээс 92 хувь хамгаална гэдгийг зарласан. Эдгээр мэдээнүүдээс харвал коронавируст цар тахлын эсрэг вакциныг дэлхийн нийт хэрэглэж эхлэхэд богино хугацаа үлдсэн бололтой.

Модерна компани ойрын долоо хоногуудад вакциныг олон нийтэд хэрэглэх зөвшөөрлөө авна гэж мэдэгджээ. Компанийн эмнэлзүйн багийн ахлах эмч Тал Закс вакцины үр дүнг гайхалтай байсныг онцлон тэмдэглэсэн бол компанийн Ерөнхийлөгч доктор Стефен Хоге вакцины хамгаалах хувь ийм өндөр гарна гэж хэн ч төсөөлөөгүй хэмээн ярьжээ.

Түүнчлэн биотехнологийн Модерна фирмийн шинжлэх ухааны багийн ахлагч Мелисса Мүр mRNA-1273 коронавирусийн эсрэг вакцины хөгжүүлэлтэд чухал үүрэг гүйцэтгэсэн хүмүүсийн нэг юм. Тэр шинэ вакцины уургийн бүтцийг шинжилжээ.

Одоогоор туршигдаж байгаа коронавирусийн эсрэг вакцинуудаас хамгийн үр дүнтэй гэж зарлаад буй Модернагийн вакциныг хэрэглэхэд та дэлхийн аль хэсэгт амьдарч байгаа, хэдэн настай эсэхээс шалтгаалах юм байна.

АНУ ирэх долоо хоногуудад эхний ээлжинд 20 сая тун хэрэглэхээр зэхжээ. Тус компани ирэх жил дэлхийн хүн амд зориулж тэрбум тун вакцин үйлдвэрлэх зорилт тавьсан байна. Их Британи улс ирэх жилийн хавар Модерна компаниас таван сая тун худалдаж авахаар захиалга өгчээ.

Гэхдээ тодорхой бус хэд хэдэн зүйл байгаа. Үүнд вакцин хийлгэсэн сайн дурынханд дархлаа хэр хугацаанд тогтож байгаа, хүмүүсийн биед хэрхэн нөлөөлж байгаа нь тодорхой бус үлджээ. Тарилга хийлгэсэн зарим өвчтөнд толгой өвдөх, хүндээр өвдөх шинж тэмдэг илэрсэн байна. Вакцины эхний тунг хийлгэснээс хойш дөрвөн долоо хоногийн дараа хоёр дахь тунг хийлгэнэ.

Коронавирусийн хямрал дэлхий даяар тархсан даруйд АНУ-ын Ерөнхийлөгч Дональд Трамп эмзүйн компаниудын удирдлагуудыг Цагаан ордонд цуглуулж уулзсан. Энэ уулзалтаар Массачусеттс мужид төвтэй Модерна компанийг төлөөлсөн Стефан Бэнсел хэдхэн сарын дотор урьдчилан сэргийлэх тарилга гаргаж авах боломжтой гэдгээ хэлж байжээ.

Эх сурвалж: ВВС, The Guardian

---