Эрүүл мэндийн яамнаас коронавирусийн нөхцөл байдлын 17:00 цагийн ээлжит мэдээллээ хүргэлээ.

ЭМЯ-ны хэлтсийн дарга Д.Нарангэрэл: "Өнөөдөр өглөө 11:00 цагаас мэдээлэл хийснээс хойш ХӨСҮТ-ийн хоёр лабораторид 98 хүнд шинжилгээ хийхэд коронавирус илрээгүй. Дорнод аймгийн нэгдсэн лабораторид 68 хүнд коронавирус илрүүлэх шинжилгээ хийхэд бүх хариу "Сөрөг" гарсан. 

Зоонозын өвчин судлалын үндэсний төвийн лаборатори Нийслэл хотын нэгдүгээр хавьтлын 909 хүнд шинжилгээ хийсэн. Өглөө 750 хүний хариу "Сөрөг" гарсан бол үлдсэн 159 хүний шинжилгээний хариу мөн "Сөрөг" гарлаа.

Мөн хоёрдугаар хавьтлын 5,314 хүнийг өнөөдрийн байдлаар шинжилгээнд хамруулсан бөгөөд 1,394 хүнээс коронавирус илрээгүй.

Өнөөдрийн УОК, Засгийн газрын хуралдаанаар хатуу хөл хорионы дэглэмийг 14 хоногоор үргэлжлүүлэх шийдвэр гарсан. Энэ бол та бидний хувьд түр зуурын асуудал. Тиймээс та бүхнийг тайван байх, эерэг хандлагатай байх, бие биедээ урам өгөх, коронавируст халдварын талаарх мэдээллийг албан ёсны эх сурвалжаас авах, худал хуурмаг цуурхалд автахгүй байх, сөрөг мэдээллээс зайлсхийх, дотны хүмүүстэйгээ утсаар холбогдон, стрессээ тайлах дасгал хөдөлгөөн хийхийг уриалж байна" гэв.

ДЭМБ-ын Монгол дахь суурин төлөөлөгч Сергей Диордица: "Монгол Улс маш урт хугацааны турш нэгдүгээр үе шат буюу зөвхөн зөөвөрлөгдсөн тохиолдолтой байсаар ирсэн. Арваннэгдүгээр сарын 10-наас эхлэн харин хэд хэдэн голомтолсон халдвар гарч ирсэн. Өөрөөр хэлбэл, хоёрдугаар үе шат руу шилжсэн. 

Нөхцөл байдал хурдан өөрчлөгдөж байгаа тул бид бас үүнтэй өрсөлдөж арга хэмжээ авах хэрэгтэй. Засгийн газраас хэрэгжүүлж байгаа арга хэмжээнүүд нь Монгол Улс дахь коронавируст халдварын дэгдэлтийг таслан зогсоох зорилготой юм. Эдгээр арга хэмжээ нь олон улсын туршлага дээр суурилсан бөгөөд Монгол Улсын өвөрмөц онцлог нөхцөл байдалтай уялдуулж хийсэн. 

Бүх хавьтлыг илрүүлж, тандахын тулд бидэнд ядаж дахиад 14 хоног шаардлагатай болж байна.

Миний зүгээс та бүхнийг төр засгаас гаргаж байгаа шийдвэрийг даган, гэртээ байж, амны хаалтаа зүүн, ханиах үедээ амаа таглан, гараа угаан, бие биеэ хамгаалахыг уриалж байна. Монгол Улс, монголчуудын эв нэгдэл нь ДЭМБ-ын зүгээс маш их сайшаагдаж, үнэлэгдэж ирсэн бөгөөд бид хамтдаа, эв нэгдэлтэй байснаар энэ саад бэрхшээлийг давж чадахыг санацгаая" хэмээн тэмдэглэв.

---