Цагдаагийн Ерөнхий Газрын Шуурхай удирдлагын штабаас мэдээлэл хийлээ.

Нийтийн хэв журам хамгаалах, олон нийтийн аюулгүй байдлыг хангах албаны дарга, хурандаа н.Лхагвасайхан: "Монгол Улсын Засгийн газраас коронавируст цар тахлын эсрэг хариу арга хэмжээ авах, урьдчилан сэргийлэх чиглэлээр хорио цээрийн дэглэм тогтоох тогтоол гарсан байгаа. Үүнтэй холбогдуулаад Цагдаагийн Ерөнхий Газрын даргын өндөржүүлсэн бэлэн байдлын нэгдүгээр зэрэгт шилжих тушаал гаран, цагдаа, дотоодын цэргийн бие бүрэлдэхүүн өндөржүүлсэн бэлэн байдалд ажиллаж байна. Ингээд цагдаагийн газрын төрөл мэргэшлийн албатуудаас цагдаагийн Шуурхай штаб дээр 24 цагаар үүрэг гүйцэтгэж байна.

Цар тахалтай тэмцэх гол ажил бол явган болон автомашины хөдөлгөөнийг хязгаарлах. Цагдаагийн Ерөнхий газар, дотоодын цэргийн бие бүрэлдэхүүн, мэргэжлийн хяналтын байгууллага, ОБЕГ, Дотоод хэргийн их сургуулийн сонсогчдын хүчээр эргүүл, хяналт шалгалтын үйл ажиллагааг явуулж байгаа. Үүний хүрээнд өдөр, шөнийн эргүүлүүд, хөдөлгөөнт эргүүлүүд, цахим эргүүлүүд болон агаарын дроны эргүүлүүдийг зохион байгуулж ажиллаж байна.

Алба хаагчдын аюулгүй байдлыг хангах чиглэлээр ажиллах цагийг 10 цагаас богиносгож, найман цагаар ажиллуулах болсон. Мөн халдвар хамгааллын хувцас хэрэглэл, бээлий, амны хаалт болон бусад чиглэлийн зүйлсээр бүрэн хангасан. Түүнчлэн алба хаагчдад халуун хоол, цайгаар үйлчлэх, дархлаажуулалтыг дэмжих чиглэлийн ажлыг зохион байгуулж байна" гэв.

Тээврийн Цагдаагийн Албанаас өнөөдрийн байдлаар нийслэл Улаанбаатар хотод зам тээврийн ослын есөн дуудлага бүртгэгдсэн хэмээн мэдэгдлээ.

Хөдөлгөөнд хязгаарлалт хийгээгүй салбар, байгууллагын ажилчин, алба хаагчид ажлын үнэмлэх болон албан газрын тодорхойлолт, томилгоот хуудас зэргийг үзүүлээд замын хөдөлгөөнд оролцож байгаа. Онц шаардлагагүй хэр нь замын хөдөлгөөнд оролцож байгаа иргэд тун бага байна. Ихэнх иргэд гэрийн дэглэмээ сахиж байна. Одоогийн байдлаар Нийслэл хотын гудамж, замын хөдөлгөөн хэвийн, ямар нэгэн зөрчил байхгүй байна.

Сонгинохайрхан дүүргийн хэмжээнд 1008 алба хаагч эргүүлд ажиллаж байна. Баянхошуу, Толгойт зэрэг чиглэлд иргэдийн хөдөлгөөн их байгаа учраас өчигдрөөс ЦЕГ-аас зохион байгуулалттай арга хэмжээ авсан бөгөөд иргэд өнөөдрөөс дэглэмээ сайн сахиж байна. Одоогоор зөвхөн хүнсний хэрэгцээнд, эмийн сан руу явж байгаа иргэдийн хөдөлгөөн байна.

Сэлэнгэ аймгийн Замын цагдаагийн тасгийн дарга, хошууч н.Эрхэмбилэг: "Сэлэнгэ аймгийн "Алтанбулаг" шалган нэвтрүүлэх хилийн автозамын боомтоор гуравдугаар сарын 18-наас өнөөдрийг хүртэл давхардсан тоогоор нийт 13 мянга орчим тээврийн хэрэгслийг нэвтрүүлж, хамгаалалт зохицуулалтад цагдаагийн газрын бие бүрэлдэхүүн ажилласан байна. 

Одоогийн байдлаар Сэлэнгэ аймгийн нийт 17 суманд тээврийн хэрэгсэл, иргэдийн хөдөлгөөнийг хязгаарласан. Орон нутгийн иргэд УОК-оос гаргасан шийдвэрийг хэрэгжүүлэх явдал дээр маш идэвхтэй, санаачилгатай ажиллаж байгаа бөгөөд одоогоор албан ёсоор ирсэн санал, гомдол байхгүй" хэмээв.

Дархан-Уул аймгийн Урьдчилсан сэргийлэх ажил хариуцсан ахлах мэргэжилтэн, хошууч А.Сэргэлэнбат: "Дархан-Уул аймгаас гарах, орох хөдөлгөөнийг нийт 13 цэгт хааж, мөн замын хөдөлгөөний 11 цэгт тогтмол хяналт тавин ажиллаж байна. Түүнчлэн өдөр, шөнийн болон хөдөлгөөнт эргүүлүүд нийт 53 чиглэлд хяналт шалгалт хийн ажиллаж байгаа юм.

Бэлэн байдлын зэрэгт шилжсэнээс хойш Дархан-Уул аймгийн хөдөлгөөн 90 орчим хувиар буурсан үзүүлэлттэй байна. Аймгийн иргэд албаныхны тавьсан шаардлагуудыг маш сайн хэрэгжүүлж байгаа" гэлээ.

Яаралтай тусламжийн 102 дугаарт өчигдөр 637 дуудлага, мэдээлэл ирсэн нь өмнөх долоо хоногтой харьцуулахад 65.3 хувиар буурчээ. Мөн гэр бүлийн хүчирхийллийн дуудлага 74 хувиар буурсан байна.

Хөл хорионы үед иргэдэд дуудлагаар архи, согтууруулах ундаа хүргэж байна гэсэн мэдээллийн дагуу 72 ширхэг архи, согтууруулах ундааг худалдаалж байсан иргэдийн ажиллагааг таслан зогсоосон ба шалгалтын ажиллагааг үргэлжлүүлж байна.

Мөн гэртээ цахимаар мөрийтэй тоглоом тоглож байгаа асуудлыг шалгаж байна. Түүнчлэн хөл хорионы үед иргэдийг айдаст автуулж, мэдээллийн төөрөгдөлд оруулж байгаа цахим мэдээллийн хэрэгслүүд дээр Эрүүгийн цагдаагийн алба шалгалт явуулж байгаа гэв.

---