Алтанбулаг боомтыг хоёр сарын хугацаанд хаахаар болоод байгаа. Тус боомтыг хааснаар өргөн хэрэглээний бараа бүтээгдэхүүний хомсдол үүсэхгүй гэж үзсэн ч дотоодод өндөгний хомсдол үүсэж эхлээд байна. Учир нь манай улс өндөгний 50 хувийг импортоор авдаг бөгөөд 90 гаруй хувийг ОХУ-аас авдаг байна.

Цар тахлын улмаас Алтанбулаг боомтыг хоёр сарын хугацаанд хаах болсоноор орос өндөгний нийлүүлэлт тасалдаж эхэлжээ. Гэтэл дотоодын өндөг үйлдвэрлэгчид үнээ нэмж иргэдийн бухимдлыг ихээр төрүүлж байна. Биднийг Барс худалдааны зах ороход өндөг авах гэсэн хүмүүс урт дараалал үүсгэж, ихээхэн бухимдалтай байсан нь энэ. Учир нь иргэд өндгөө урьдчилж захиалаад төлбөрөө төлсөн ч өнөөдөр өглөөнөөс эхлэн өндөгний үнэ 20-40 төгрөгөөр нэмэгдсэн байна

Манай улс нийтдээ 980,000 орчим өндөглөгч тахиатай, жилд 230 сая орчим өндгийг зах зээлд гаргадаг судалгаа бий. Энэ нь дотоодын өндөгний зах зээлийг бүрэн хангаад зогсохгүй, үнийн өсөлт гаргахгүйгээр ажиллах бүрэн боломжтой, гэж үздэг. Шувууны аж ахуйчдын үйл ажиллагаа хэвийн явагдаж байгаа ч хямралын үед өндөгний үнийг нэмэх нь иргэдээ бодоогүй ашиг харсан үйлдэл байсан уу?

---