Бельги улсын мэдээ алдуулагч эмч британи эмэгтэйд хийсвэр хагалгаа хийхийн өмнө алдаа гаргаснаас өвчтөн амь насаа алдсан гэж үзсэн тул гурван жилийн хорих ял оноожээ.

51 настай Хелга Ваутерсын шүүх хурал Францын Пау хотод пүрэв гарагт болсон байна. Түүнийг 2014 онд 28 настай Синтия Хоукийн үхэлд буруутай гэж үзсэн. Мөрдлөгийн дүнд мэдээ алдуулагч эмч амьсгалын гуурсыг өвчтөний салхин хоолойд хийх ёстой байсан ч улаан хоолойд нь хийсэн гэдгийг тогтоожээ.

Болж өнгөрсөн хэрэг явдлыг эргэн санавал 2014 оны есдүгээр сард Францын Пау хотын Ортез эмнэлэгт хатагтай Хоук хэвтжээ. Тэр амаржихаар ирсэн боловч хүндрэл гарч яаралтай хийсвэр хагалгаанд орохоор болсон. Гэвч Бельги дэх эмнэлгээсээ халагдаж Францад ирсэн Ваутерс нь хагалгааны үеэр согтуу байжээ. Тэр согтууруулах ундаанд донтогч бөгөөд өглөө бүрийг архи, устай хамт эхлүүлдэг байна. Яаралтай хагалгаанд дуудагдахаасаа өмнө хундага дарс уусан гэж өөрөө хэлсэн боловч амнаас нь согтууруулах ундаа үнэртэж, саатуулан шинжилгээ хийхэд цуснаас нь 10 хундага дарс уусантай тэнцэх хэмжээний согтууруулах ундаа илэрчээ.

Тэр хагалгааны үеэр амьсгалын гуурсыг буруу газарт суурилуулсны дээр амьсгалын аппаратны оронд хүчилтөрөгчийн баг зүүлгэсэн байжээ. Хагалгааны дундуур өвчтөн гэнэт сэрж, бөөлжин маш их өвдөж байна хэмээн орилжээ. Дутуу мэдээ алдсанаас болж хэт их өвдөлт мэдэрсэн эмэгтэйн зүрх зогсож хагалгаанаас хойш дөрөв хоногийн дараа нас баржээ. Азаар эмэгтэйн хэвлийд байсан хүү аврагдсан байна.

Ваутерс хэргээ ганцаараа хүлээхээс татгалзсан боловч мөрдөгчид бусад эмч сувилагчид буруугүй гэдгийг баталжээ. Шүүхийн шийдвэрээр хорих ялаас гадна Хоукийн гэр бүлд 1,4 сая еврогийн нөхөн төлбөр олгохоор болсон байна. Мөн бүх насаараа хийсэн үйлдэлдээ харамсаж амьдарна хэмээн ялтан шүүх танхимд мэдэгджээ.

Эх сурвалж: ВВС

---