Монгол Улс дотооддоо коронавирусийн халдвар алдсантай холбогдуулан улсын хэмжээнд өнөөдрөөс /2020:11:12/ 06:00 цагаас эхлэн тав хоногийн хугацаанд хатуу хөл хорио тогтоогоод байгаа. 

Сэлэнгэ аймгийн Сүхбаатар сумын иргэн 74 настай эмэгтэйгээс коронавирус илэрсэнтэй холбогдуулан Сэлэнгэ аймгийн Засаг дарга Ш.Оргил: Иргэн Ц нь 11 дүгээр сарын 6-наас зовиурлаж 38 хүртэл халуурч, толгой өвдөн, дотор муухайрах шинж тэмдэг илэрсэн. Өрхийн эмнэлгээр үзүүлж, гурав хоногийн дараа буюу аймгийн төвийн эмнэлгийн эхо, рентгэнд үзүүлсэн. 10 хоногийн өмнөөс ханиалгаж эхэлсэн байна. Аймгийн онцгой комисс шуурхай ажиллан хамгийн ойрын хавьтлуудыг тодорхойлж тэдгээр хүмүүсийг шинжилгээнд хамруулсан" гэв.

Мөн Сэлэнгэ аймгийн иргэдэд хоол хүнсний хангамж хангалттай байгааг сануулж, эрүүл ахуйн дэглэмээ сайтар баримталж, гэрээсээ гарахгүй, нэгнийдээ зочлохгүй байхыг, амны хаалтаа заавал зүүхийг анхаарууллаа. Тус аймгийн хүрээнд хөл хөдөлгөөнийг бүрэн хориод байгаа аж.

Мөн Дархан-Уул аймагт нэг сэжигтэй тохиолдол илэрсэн тул Дархан-Уул аймгийн Онцгой комиссоос мэдээлэл хийлээ. Тус аймагт цар тахлаас сэргийлэхийн тулд цэрэг цагдаагийн хүчийг дайчилж эхэлсэн гэв. Учир нь Сэлэнгэ аймгаас илэрсэн коронавирусийн тохиолдол болсон 74 настай эмэгтэй худалдааны төвүүдээр орж гарсан аж.

Дархан уул аймгийн Засаг дарга Б.Азжаргал: "Дархан-Уул аймгийн хөдөлгөөнийг 80 хувь буурууллаа. Цаашид 95 хүртэл хувиар хөдөлгөөнийг бууруулахаар ажиллаж байна. Өнөөдрөөс эхлээд Дархан-Уул аймгийн 11 постыг ажиллуулж орох гарах хөдөлгөөнийг хязгаарлаж эхэллээ. Ард иргэдэд хүнсний үйлчилгээ, үйлдвэрлэл хангалттай, хэвийн байгаа тул өргөн хэрэглээний барааны хиймэл хомсдол үүсгэж үнийн хөөрөгдөл үүсгэхгүй байхыг хүсье. Өнөөдрийн байдлаар манай аймагт 116 хоногийн махны нөөц, 440 хоногийн гурилын нөөц, 220 тонн төмс хүнсний ногооны нөөц бий. Бид махны үнийг өсгөхгүйн тулд жижиглэн болон бөөний үнийг тогтоохоор ажлын хэсэг гарсан" гэлээ.

---