УИХ-ын чуулганы нэгдсэн хуралдаан өнөөдөр болох байсан ч өндөржүүлсэн бэлэн байдлын зэрэгт шилжсэнтэй холбоотойгоор Төрийн ордонд ямар нэгэн хурал, чуулган зохион байгуулсангүй. Мөн хэвлэл мэдээллийнхнийг ч Төрийн ордон руу нэвтрүүлээгүй юм. 

Харин маргааш буюу 10-аар сарын 13-ны өдрийн хуралдааныг цахимаар хийх туршилтыг яг одоо хийж байгаа ажээ.  

Уг туршилтаар УИХ-ын гишүүд Төрийн ордонд ирэлгүйгээр байгаа газраасаа хуралдаанд оролцох боломжийг хангахаар ажиллаж байгаа юм байна. Хэрэв уг туршилт болохгүй бол УИХ-ын 76 гишүүнийг Төрийн ордон дахь таван танхимд хувааж суулгаад хуралдах боломжтой юм.

Дээрх хоёр хувилбарын алин болох, хуралдааны дэгийн талаар хэлэлцэж байгаа юм байна.

Монгол Улсын 2021 оны төсвийн тухай болон түүнийг дагалдах хуулиудыг арваннэгдүгээр сарын 15-наас өмнө батлах ёстой. УИХ-ын байнгын хороодоор төсвийн гурав дахь болон эцсийн хэлэлцүүлгийг хийж, чуулганы хуралдаанаар батлахад бэлэн болгоод байгаа юм.

---