ХБНГУ-ын баруун хэсэгт орших Нидерланд улстай хиллэх бүсийн ойролцоох гаалийн газраас 6.5 сая евро буюу 7.7 сая ам.долларын бэлэн мөнгө хулгайлагдсан хэрэг энэ сарын эхээр гарчээ.

Тэгвэл Германы эрх баригчид иргэдээс тусламж хүсэн, гэмт хэрэгтнүүдийг баривчилгаанд хүргэх мэдээлэлд 100 мянган евро буюу 118 мянган ам.долларын шагнал санал болгосон байна.

Тус улсын Эммерих ам Рейн хотын гаалийн барилгад энэ сарын 1-ний өдрийн өглөөний 06:00 цагийн орчимд чанга дуу чимээ сонсогдсон бөгөөд үүнээс бараг таван цагийн дараа бараан хувцас, хар малгайтай гурван эрэгтэй цагаан фургонд юм ачиж байсныг гэрч харсан аж.

Мөн энэ үеэр ижил төстэй хувцастай өөр нэгэн эрэгтэй гудамжаар явж харагдсан бөгөөд гэрч түүний зургийг авчээ. Ойролцоох Клеве хотын цагдаа нар тус зургийг нийтлэн, шагналын мэдээллийн хамт олон нийтэд дэлгэсэн байна.

Цагдаагийн газрын мэдээлснээр гурван сэжигтэн хөрш зэргэлдээх барилгаар дамжин гаалийн газрын хонгилын ханыг өрөмдөн, аюулгүй цүнхэнд хадгалсан байсан бэлэн мөнгийг хулгайлсан гэнэ. Түүнчлэн тэдний ашигласан цагаан фургон нь Клеве хотын дугаартай байсан аж.

Эх сурвалж: Associated Press

---