Испанийн цахим сүлжээгээр ойрын өдрүүдэд эртний барилга дээрх хөшөөг сэргээн засварлаж АНУ-ын Ерөнхийлөгч Дональд Трамптай төстэй царайтай болгосныг хурцаар шүүмжлэн иргэд дургүйцлээ илэрхийлсээр байна. Испани улсын Паленсиа хотод 20 дугаар зууны эхэнд баригдсан барилгын нүүрэн дээр чимэглэсэн хөшөө дурсгалыг засварлахаас өмнө инээмсэглэж буй эмэгтэйн хэлбэр дүрстэй байжээ.

Гэвч сэргээн засварласны дараа малаа хариулан инээмсэглэж байгаа уг эмэгтэйн царай өнгөц харахад Дональд Трамп, аль эсвэл Оддын дайн киноны элсэн цөлийн иргэдтэй төстэй харагдах болсон байна. Цахим орчинд тархсан маргаантай зургийн талаар Испанийн зураач Антонио Гузман Капел сэтгэгдлээ илэрхийлжээ. Түүнийхээр зургуудыг бүдгэрүүлсэн байгаа боловч ямар инээдтэй болж хувирсан нь тод харагдаж байна.

Одоогоос найман жилийн өмнө 2012 онд тус улсын Боржа тосгоны эрх баригчид Монки Христийн сүлжмэл зурган дүрийг сэргээн засварлахдаа анхны төрхийг алдагдуулсанд иргэд уурлаж, ихээхэн цочирдож байсан юм. Тухайн жилд Христийн засварласан зургийг харахаар 50,000 жуулчин Боржа тосгоны Экке Хомо сүмд очжээ. Одоо ч жил бүр хэдэн мянган жуулчин уг зургийг сонирхон очдог бөгөөд эндээс олсон ашгаа ахмадуудын асран хамгаалах төвд туслахад тодорхой хувь нэмрээ оруулдаг байна.

Гэхдээ энэ жил олны анхаарлыг татаж, маргаан дагуулах сэдэв болоод байгаа уг засвар нь сэргээн засварлалтын мэргэжилтнүүдэд мэргэжлийн сургалт, хамгаалалт, хөрөнгө оруулалт нэн шаардлагатай байгааг харуулсан жишээнүүдийн нэг боллоо гэж тайлбарлажээ. Испанийн сэргээн засварлах салбарын ажилтнууд ч энэ ажлыг мэргэжлийн бус болсон гэдгийг хүлээн зөвшөөрч байна.

Эх сурвалж: The Guardian

---