Дэлхий дахинд өнгөрсөн 24 цагийн хугацаанд коронавирусийн халдварын 537,632 шинэ тохиолдол бүртгэгдэж, 9,121 хүн нас барснаар батлагдсан нийт тохиолдол 51 сая 800 мянга орчим болж, 1,3 сая орчим хүн нас бараад байна.

Халдварын тархалтаар АНУ тэргүүлсэн хэвээр бөгөөд тус улсад долоо дахь хоногтоо дараалан халдварын шинэ тохиолдол 100,000-аас илүү илэрчээ. Тус улсад өчигдөр 135,000 шинэ тохиолдол нэмэгдэж, 1,300 гаруй хүн нас барсан байна.

Манай хойд хөрш ОХУ халдварын тархалтаараа дэлхийд тавдугаарт бичигдэж байгаа ба өнгөрсөн нэг хоногт халдварын 21,000 орчим шинэ тохиолдол илэрч, 400 хүн нас баржээ.

Тэгвэл халдварын шинэ тохиолдол бараг илрэхгүй байсан өмнөд хөрш БНХАУ-д хоногийн хугацаанд 17 шинэ тохиолдол бүртгэгдсэн байна. Энэ тоо нь өмнөх өдөр бүртгэгдсэн 22 тохиолдолтой харьцуулахад буурсан үзүүлэлт болжээ.

Дэлхийн бусад улс орнуудад коронавирусийн нөхцөл байдал ямар байгаа талаар мэдээлэхэд

·         Бразил улсад 24 цагийн дотор 25,000 шинэ тохиолдол нэмэгдэж, нийт тохиолдол 5,7 сая боллоо. Эрүүл мэндийн яамны мэдээллээр тус улсад нийт 162,829 иргэн нас баржээ.

·         Европын улс орнуудад ковид-19-өөр нас барсан иргэд 300,000 давсан байна.

·         Их Британид тавдугаар сараас хойш 24 цагийн дотор коронавирусээр хамгийн их хүн буюу 532 иргэн нас барсан тохиолдол бүртгэгдэв.

·         Мөн Франц улсад даваа гарагт хоногт 551 иргэн эндсэн нь коронавирусийн хоёр дахь давлагаа эхэлснээс хойш хамгийн өндөр үзүүлэлт болжээ.

·         Италийн Засгийн газар нэмж таван мужид хорио цээрийн дэглэмийг чангатгалаа.

·         Ливан болон Иран улсууд хорио цээрийн дэглэмд шилжлээ.

·         Европын комисс лхагва гарагт хуралдаж Германы BioNTech болон Америкийн Pfizer фирмүүдийн хамтран гаргаж буй коронавирусийн эсрэг тарилгаас 300 сая тунг худалдаж авах шийдвэрийг албан ёсоор хэлэлцэхээр болжээ.

Эх сурвалж: The Guardian

---