Ардчилсан намын аравдугаар их хурлыг 11-р сарын 16-ны өдөр зохион байгуулахаар товлоод байсан. УОК-ын шийдвэртэй холбоотойгоор уг хурлыг хэрхэн хийх тухай АН-ын аравдугаар их хурал зохион байгуулах комисс хэлэлцэж байна.

АН-ын даргын үүрэг гүйцэтгэгч Ц.Туваан "Улс оронд нэлээн төвөгтэй байдал үүслээ. УОК-ын тогтоолоор зорчигч тээврийн гарах хөдөлгөөн, бүх шатны боловсролын байгууллагын хичээл сургалт, үзвэр үйлчилгээ, цахим болон хүүхдийн тоглоомын төвүүдийн үйл ажиллагааг түр зогсоох шийдвэр гарсан байна.

АН-ын аравдугаар их хурлыг энэ сарын 16-нд зарлаад бүх бэлтгэл ажиллаа хийгээд явж байсан ч УОК-ын шийдвэртэй холбогдуулан тус хурлыг хэрхэн хийх талаар хэлэлцэхээр болоод байна.

Хурлаар хэлэлцэх гол асуудал болох намын үндсэн дүрэмтэй холбоотой асуудлуудыг хэлэлцэнэ. Үндсэн дүрмийн ажлын хэсгийн гишүүд бүх 21 аймагт тарж ажиллаж байх үед УОК-ын тогтоол гарлаа. Тиймээс бид 21 аймгийн дарга нартай холбогдож цахим хэлбэрээр ярилцаж байна" гэв.

---