Бүгд Найрамдах Перу Улсын Конгрессоос Ерөнхийлөгч Мартин Визкарраг албан тушаалаас нь огцруулах шийдвэр гаргасны дараа тус улсад улс төрийн тодорхойгүй байдал үүсээд байна.

Энэхүү явдал Перугийн иргэдийн дургүйцлийг хүргээд байгаа хэдий ч Ерөнхийлөгч Визкарра уг шийдвэрийг эсэргүүцэн, шүүхэд хандахгүй бөгөөд төрийн тэргүүний албан тушаалаасаа огцорно гэдгээ мэдэгджээ. Харин перучууд шөнө гудамжинд гаран, уур бухимдал, эсэргүүцлээ илэрхийлэн тогоо, шанагаа нүдэж эхэлсэн байна.

Тус улсын сөрөг хүчний есөн намын хууль тогтоогчид нэгдэж, 57 настай Ерөнхийлөгчийг огцруулах шийдвэр гаргажээ. Тэд Визкарраг авлигын хэрэгт буруутган, мөн цар тахлын үед авсан арга хэмжээг нь шүүмжилсэн юм. Перугийн нийт 130 хууль тогтоогчийн 105 нь түүнийг огцруулахыг дэмжсэн санал өгсөн аж.

Албаныхан Мартин Визкарраг Мокегуагийн өмнөд бүсийн захирагч байхдаа хэд хэдэн компаниас 600 мянга гаруй ам.долларын хээл хахууль авсан хэмээн буруутгаж байгаа боловч тэрээр үүнийг эрс үгүйсгэн, огт үндэслэлгүй, худал гэж үзэж байгаа юм. Ерөнхийлөгчийн үүрэг гүйцэтгэж байхдаа тэрээр авлигын эсрэг хатуу тэмцдэг байсан бөгөөд энэ нь түүнийг иргэдийн дунд нэр хүндтэй болгосон бол Конгресст олон дайсантай болгосон байна.

Перу улсын үндсэн хуулийн дагуу Конгрессын Ерөнхийлөгч Мануэль Мерино Визкаррагийн түр орлон гүйцэтгэгчээр ажиллахаар болжээ. Сөрөг хүчний хууль тогтоогч тэрээр ирэх лхагва гарагт тангараг өргөх аж.

Эх сурвалж: The Guardian

---