Манай улсын гадаад худалдааны бараа эргэлтийн 65 орчим хувийг бүрдүүлдэг БНХАУ-ын юанийн ханш түүхэн дээд түвшиндээ хүрлээ.

Тодруулбал, Монголбанкнаас зарласан албан ханшаар өнөөдөр нэг юань 433.87 төгрөгтэй тэнцсэн нь нэг сарын хугацаанд 9.62 төгрөгөөр нэмэгдсэн, түүхэн дээд үзүүлэлт болов.

Түүнчлэн валют арилжааны “Найман шарга” захад ченжүүд өнөөдөр юанийг 431 төгрөгөөр худалдан авч, 432-оор борлуулж байна. Энэ нь сүүлийн долоо хоногт уг валютыг авах ханш тав, зарах нь зургаан төгрөгөөр өссөн дүн бол гурван сарын хугацаанд 30 орчим төгрөгөөр нэмэгдсэн үзүүлэлт юм.

Тэгвэл төгрөгийн ханш юанийн эсрэг 0.84 хувиар суларсан. Олон улсын зах зээлд юань чангарч байгаа нь төгрөг юанийн хослолд голлон нөлөөлж байгааг Төв банкнаас мэдээлж байгаа юм.

---