Шинэ Зеланд улсад болсон бүх нийтийн санал асуулгын эцсийн дүн өнөөдөр гарч, тус улс марихуаныг хуульчлахгүй гэдэг нь тодорхой болов. 

Каннабисыг хуульчлах талаарх бүх нийтийн санал асуулга ширүүн өрсөлдөөн үүсгэсэн бөгөөд эцсийн дүнгээр иргэдийн 48 хувь нь дэмжсэн бол 51 хувь нь эсэргүүцсэн байна. Тус улсад өнгөрсөн аравдугаар сарын 17-нд болсон Парламентын сонгуулийн дараагаар гадаадад байгаа иргэдийн тусгай саналыг хүлээн авч, нэгтгэснээр ийнхүү эцсийн дүн гарчээ.

Марихуаныг хуульчилснаар гэмт бүлэглэлүүдийн ашиг орлогыг бууруулж, уугуул Маори иргэдийн нийгэм, хууль эрх зүйн нөхцөлийг сайжруулна гэж тус улсын мэргэжилтнүүд үзэж байсан юм. Харин Шинэ Зеландын Ерөнхий сайд Жакинда Ардерн аравдугаар сарын 17-ны санал хураалт хүртэл ямар байр суурьтай байгаагаа илчлээгүй нь тус төслийн дэмжигчдийг бухимдуулсан байна.

Тэд Ардерны дэмжлэг олон хүний шийдвэрт эергээр нөлөөлнө гэж үзэж байсан хэдий ч Ардерн сонголтыг Шинэ Зеландчуудад үлдээхийг хүсэж байгаагаа илэрхийлжээ. Тэгвэл тэрээр тус саналыг дэмжсэн гэдгээ өнөөдөр мэдэгдсэн байна.

Харин консерватив үзэлтэй хууль тогтоогч Ник Смит тус санал асуулгын эцсийн дүнд сэтгэл хангалуун байгаагаа илэрхийлэн, "Энэ бол эрүүл саруул ухааны ялалт. Судалгаанаас харахад каннабис нь сэтгэцийн эрүүл мэндэд сөргөөр нөлөөлж, хүсэл эрмэлзэл, боловсролын амжилтыг бууруулж, зам, ажлын байран дахь нас баралтыг нэмэгдүүлдэг. Каннабисыг хууль ёсны болгох нь үүнийг хэвийн зүйл болгож, илүү хүртээмжтэй болгон, ашиглалтыг нэмэгдүүлж, илүү их хор хөнөөл учруулна гэдгийг Шинэ Зеландчууд зөв дүгнэлээ" хэмээн мэдэгджээ.

Сонирхуулахад, одоогоор Канад, Өмнөд Африк, Уругвай, Гүрж болон АНУ-ын хэд хэдэн муж марихуаныг хуульчлаад байгаа билээ.

Эх сурвалж: Associated Press

---