АНУ-ын Хойд Каролина мужийн 11-р Конгрессын тойрогт урьдчилсан дүнгээр ялалт байгуулсан 25 настай Мэдисон Кавторн тус улсын орчин үеийн түүхэн дэх хамгийн залуу Конгрессын гишүүн болов.

Тус улсын Конгрессын доод танхим болох Төлөөлөгчдийн танхимд Бүгд найрамдах намаас нэр дэвшсэн Кавторн Ардчилсан намын өрсөлдөгч Моэ Дэвисийг ялжээ. Улс төрд дөнгөж хөл тавьж байгаа хэдий ч тууштай консерватив үзэлтэн тэрээр Ерөнхийлөгч Дональд Трампын дэмжиж байсан нэр дэвшигчийг унаган, ийнхүү гэнэтийн ялалт байгуулсан байна.

Өмнө нь орчин үеийн түүхэн дэх хамгийн залуу гишүүнээр Нью-Йоркийн Ардчилсан намын төлөөлөгч Александрия Окасио-Кортез тодорч байсан бөгөөд тэрээр 2018 онд сонгогдохдоо 29 настай байжээ. Харин АНУ-ын түүхэн дэх хамгийн залуу гишүүн бол 1797 онд 22 настайдаа сонгогдож байсан Теннесси мужийн Уильям Чарльз Коул Клэйборн аж.

Тэгвэл Мэдисон Кавторн түүний сонгуульд нэр дэвших болсон шалтгаан нь Александрия Окасио-Кортезоос болсон гэж мэдэгдсэн байна. Тэрээр "Бидний итгэл, эрх чөлөө, үнэт зүйл маань Нэнси Пелоси, Александрия Окасио-Кортез зэрэг баруун, зүүн хойд эргийн либерал үзэлтэн болон зүүнтнүүдийн дайралтад өртөж байгаа тул би сонгуульд нэр дэвшсэн" хэмээн өөрийн цахим хуудаснаа бичжээ.

Кавторн төсвийн хувьд консерватив үзэлтэй бөгөөд үр хөндөлтийг эсэргүүцэж, галт зэвсгийн чөлөөтэй хэрэглээг дэмжин, цагаачлалын хатуу бодлого баримталдаг нэгэн аж. Тэрээр өөрийгөө "Америкийг агуу болгосон итгэл үнэмшил, гэр бүл болон эрх чөлөөг хамгаалахын төлөө ажилладаг үндсэн хуулийн консерватив үзэлтэн" гэж тодорхойлсон байна.

Эх сурвалж: CNN

---