Төрийн мэдлийн мэдээллийн сувгаар дамжуулснаар Умард Солонгосын Ардын их хурлын шийдвэрээр иргэдийн амьдарч буй хүрээлэн буй орчны эрүүл ахуйг хангах үүднээс олон нийтийн газарт тамхи татахыг хоригложээ.

Өнөөдөр танилцуулсан уг мэдэгдэлд дурдсанаар нийтийн эрүүл мэнд, амь насыг хамгаалахын тулд тамхины борлуулалт худалдаа, хэрэглээг хязгаарлахаар болсон байна. Олон нийт цугладаг томоохон өргөн чөлөөнүүд, улс төрийн болон боловсролын төвүүд, кино театрууд, дуурь жүжгийн театрууд болон эрүүл мэндийн чиглэлээр үйл ажиллагаа явуулдаг байгууллагуудад тамхи татах хориотой болжээ.  

Дэлхийн эрүүл мэндийн байгууллагын 2013 онд хийсэн судалгаагаар тус улсын эрчүүдийн 44 хувь нь тамхи татдаг гэжээ. Умард Солонгосын удирдагч Ким Жон Ун гартаа үргэлж тамхи барьж явдаг, олон жил тамхи татаж буй гэдгийг эх сурвалжууд онцолдог. 2019 онд АНУ-ын Ерөнхийлөгч Дональд Трамптай хоёр дахь удаагаа уулзахаар Вьетнамын Ханой хотыг зорих замдаа тэрээр Хятадын Наннинг хотод галт тэрэгний буудал дээр тамхи асааж буй зураг нь олонд хүрсэн байдаг.

Эх сурвалж: The Guardian

---