АНУ-ын Хойд Дакота мужийн бизнесмен болон фермер Дэвид Андал коронавирусээр өвчлөн, өнгөрсөн аравдугаар сарын 5-нд нас баржээ. Тэгвэл АНУ-ын Конгрессын доод танхим болох Төлөөлөгчдийн танхимд нэр дэвшээд байсан тэрээр сонгуульд ялалт байгуулсан байна.

Бүгд найрамдах намаас нэр дэвшээд байсан Андал Хойд Дакотагийн наймдугаар тойрогт сонгогдон, хоёр суудлын нэгийг нь авахаар болсон аж. Тус мужийн сонгуулийн албан бус үр дүнгээс харахад тэрээр нийт саналын 35.53 орчим хувийг авсан гэнэ.

Дэвид Андал 16 жилийн турш Бэрлей бүс нутгийн Төлөвлөлт, бүсчлэлийн комисст ажилласан бөгөөд тус комиссыг найман жил даргалсан аж. Түүний гэр бүлийн зүгээс "Андал олон жилийн турш төрийн албан хаагч байсан бөгөөд мужийн хууль тогтоох байгууллагад ажиллах боломжийг тэсэн ядан хүлээж байсан. Түүний энэхүү хүсэл биелээгүйд бид ихэд гуниглаж байна. Дэвидийг дэмжсэн хүн болгонд талархал илэрхийлье" гэж хэлсэн байна.

Андалыг аравдугаар сард нас барахад түүнийг арваннэгдүгээр сард болох сонгуульд ялалт байгуулбал юу болох талаар олон хүн асуулт тавьж байсан юм. Тэгвэл Хойд Дакота мужийн Ерөнхий прокурор энэ нөхцөл байдлыг албан тушаалтан огцрох, эсвэл тэтгэвэрт гарах шийдвэр гаргасантай адилтгаж үзэх ба дүүргийн Бүгд найрамдах нам түүний сул суудлыг нөхөх төлөөлөгч томилно хэмээн мэдэгджээ.

Эх сурвалж: CNN

---