УИХ-ын Хууль зүйн байнгын хорооны хуралдаанаар ХЭҮК-ын гишүүдийг томилох асуудлыг хэлэлцэж байна.

Хүний эрхийн үндэсний комиссын шинэ бүрэлдэхүүнийг сонгон шалгаруулах ажлын хэсгээс Х.Мөнхзул, Д.Сүнжид, Г.Нарантуяа, Ж.Хунан, Б.Энхболд нарын нэрийг оруулж ирснийг хүн тус бүрээр хэлэлцэж, гишүүд санал хүсэлтээ илэрхийлж байна.
Хууль зүйн сайд Х.Нямбаатар "УИХ маш хариуцлагатай, нээлттэй, цаашид жишиг гэж хэлж болохуйц томилгоог хийх гэж байна. Нээлттэй сонсгол явуулж, ил тод сонгон шалгаруулалт хийснээр өмнө нь хууль бус, ёс бус асуудалд нэр холбогдсон хүмүүс төрийн өндөр албан тушаалд томилогдох явдал байхгүй болно" гэв.
ХЭҮК-ын эрүү шүүлтийн асуудал хариуцсан гишүүнд нэр дэвшсэн нэр дэвшигчийг яагаад оруулж ирээгүй талаар Ш.Раднаасэд гишүүн асуухад ажлын хэсгийн ахлагч М.Үнэнбат "Эрүү шүүлтийн асуудал хариуцсан гишүүнд нэр дэвшигчид шаардлага хангахгүй байсан тул тухайн орон тоонд дахин сонгон шалгаруулалт явуулах саналыг оруулж ирлээ" гэсэн юм.

Харин УИХ-ын гишүүн Б.Энхбаяр "ХЭҮК-ын шинэ бүрэлдэхүүнд нэр дэвшигчдэд сэтгэл хангалуун байна. Эдгээр хүмүүс дунд нам дагаж явсан нэг ч хүн байхгүй байгаад талархаж байна. Цаашид энэ жишгийн дагуу цүнх баригчид бус, харин эрдэмтэй мэдлэгтэй залуучууд өөрийнхөө мөнчгөрөөр амжилтад хүрч болдог жишиг тогтоосой. Жендерийн харьцаа, ажлын туршлага, эрдэм боловсол, эзэмшсэн мэргэжил нь мундаг идэр насны залуучууд томилогдож байгаад баяртай байна" гэв.

Ингээд 14 цагийн үед ХЭҮК-ын гишүүнд нэр дэвшигчдийг хүн нэг бүрээр санал хураахад Д.Сүнжид, Х.Мөнхзул, Б.Энхболд, Г.Нарантуяа, Ж.Хунан нарыг дэмжлээ. 

---